З гэтых слоў пачаў размову з галоўнымі аграномамі раённых сельгасарганізацый, спецыялістамі райсельгасхарчу саветнік старшыні Магілёўскага аблвыканкама Барыс Клешчукевіч падчас рабочага семінара на базе філіяла “Харчавік-Агра” ААТ “Чырвоны харчавік” у гэтую сераду. “Цяпер галоўнае — не толькі колькасць і якасць атрыманай прадукцыі, але і эфектыў­насць, якой дасягнулі пры яе вытворчасці”, — канстатаваў саветнік.

— Каб быць у сучасных умовах канкурэнтаздольнай, ваша прадукцыя павінна вытрымліваць не толькі якасныя патрабаванні, але і цэнавыя, — дадаў ён.

На семінары вялася размова, якім чынам зрабіць таннейшай вытворчасць раслінаводчай прадукцыі, а праз яе — і жывёлагадоўлі на такіх этапах, як уборка кукурузы (да яе раён толькі прыступае), сяўба прамежкавых і азімых культур. У “Харчавіку-Агра”, як было адзначана, — у гэтым плане прыкметныя дасягненні. Прапанаваўшы наведаць падрыхтаванае да сяўбы азімых жыта і сурэпіцы (палосна) поле, кіраўнік філіяла Міхаіл Стрыжэўскі падрабязна спыніўся на тэхналагічных момантах і прыёмах, якія прымяняюць у гаспадарцы, каб знізіць матэрыяльныя выдаткі і на пад­рыхтоўку глебы, і непасрэдна на сяўбу, прывёў дакладныя лічбы дасягнутай эканоміі. У прыватнасці, ён адзначыў, што адзін гектар падрыхтаванага і засеянага поля абыходзіцца гаспадарцы ў 9,38 л паліва.

На змешаных і палосных пасевах увага акцэнтавалася асобна. Каб забяспечыць “сытую” вясну для жывёлагадоўлі, іх у гаспадарках павінны пасе­яць у разліку 50 сотак на адну рагулю. Тым, хто да гэтага не прыступіў, настойліва ўказана парупіцца. Была звернута ўвага на танны, але такі важны тэхналагічны момант падчас падрыхтоўкі палёў, як выкарыстанне балкі для ўшчыльнення глебы, што садзейнічае лепшаму “засвойванню” насення, а ў выніку — павелічэнню ўраджайнасці культуры. У “Харчавіку-Агра” ім не пагарджаюць і ўпэўнены — на правільным шляху.

Калі пачынаць уборку кукурузы, у якой фаза спеласці — на зерне, як распланаваць работу ўборачнай тэхнікі на полі, каб у зерня была магчымасць прасушыцца, на якія тэхналагічныя моманты звярнуць асаблівую ўвагу падчас закладкі кукурузнага сіласу — пра ўсё гэта гаварылася за абмеркаваннем “кукурузнага” пытання.

На прыкладзе “Харчавіка-­Агра” ўдзельнікам семінара была прадэманстравана сур’ёзная работа з пашай. Галоўны аграном Валянціна Масолава распавяла, якія травы выкарыстоўваюць, чым, калі і ў якіх прапорцыях уздабняюць і г. д. Надаіўшы ў мінулым годзе на адну карову 5281 кг малака, сёлета ў гаспадарцы, як адзначыў галоўны заатэхнік Міхаіл Бандарчук, паставілі задачу “павялічыцца” да 5800 і ўпэўнена да гэтага рухаюцца. За 7 месяцаў маюць 3473 кг, што на 258 кг болей, чым за такі ж перыяд 2017-га.

На полі, дзе ўжо актыўна зазелянеў азімы рапс, падрабязна спыніліся на доглядзе гэтай культуры і азімай сурэпіцы. Дэталёва абмеркавалі мерапрыемствы, якія неабходна выканаць перш чым пасевы ўвойдуць у зімоўку. Зноў жа — з прыцэлам на эфектыўнасць вытворчасці, каб можна было разлічваць на добры ўраджай.

Алена КАРПЕНКА. Фота аўтара.