У гарачую пару ўборкі збажыны — уся ўвага да хлебаробаў.

Лепшых з лепшых работнікаў палёў ушаноўваюць не толькі ў калектывах, дзе яны працуюць. Падбадзёрыць і падзякаваць людзям нялёгкіх прафесій за іх, без перабольшання сказаць, гераічныя будні — чаго вартая толькі сёлетняя спякота — і неперацэнны ўнёсак у справу забеспячэння харчовай бяспекі краіны непасрэдна на палі выязджаюць прадстаўнікі грамадскіх аб’яднанняў, прафсаюзы.
Вось і ў гэты панядзелак камбайнер Леанід Чэрнік і яго памочнік Дзмітрый Гайсенка — члены аднаго з найлепшых экіпажаў зернеўборачных камбайнаў ААТ “Неўскі-Агра” ўдастоіліся Лістоў удзячнасці і грашовых прэмій Беларускага прафесійнага саюза работнікаў гандлю. Уручаючы ўзнагароды, старшыня прафсаюза Аксана Герашчанка адзначыла, што адносіны хлебаробаў да працы заслугоўваюць самых цёплых слоў пашаны. Аксана Цімафееўна, а таксама Сяргей Феднеў, старшыня райкама прафсаюза работнікаў АПК, выказалі падзяку зладжанаму экіпажу за руплівасць і гаспадарскі падыход да даручанай справы, за дасягнутыя — і не толькі сёлета — поспехі. Пажадалі работнікам палёў і іх сем’ям здароўя, працоўнага запалу і плёну.

— Беларускі прафсаюз работнікаў гандлю ўзнагароджвае лепшых з лепшых працаўнікоў уборачнай кампаніі па ўсёй краіне другі год запар, — адзначыла Аксана Герашчанка. — Упэўнена, што гэта стане добрай традыцыяй, бо ад вынікаў работы хлебаробаў напрамую залежыць дабрабыт усёй краіны і кожнага чалавека ў прыватнасці.

Алена КАРПЕНКА. Фота аўтара.