У Бабруйскім ААТ “Аграмашсервіс” займаюцца зборам чорнага золата

Пачалі ўбіраць азімы рапс на пачатку тыдня, з больш высокага поля, прычым, з не лепшых яго ўчасткаў, таму на сераду (дзень нашага наведвання) ураджайнасць мелі 10 цэнтнераў з гектара.

Дырэктар Сяргей Тарабуеў дэманструе рапс, дзе бачна, як расліна, з-за дэфіцыту вільгаці, пазбавілася ад бакавых адросткаў.

На ўчарашнюю раніцу ў гаспадарцы было ўбрана 96 з 210 адведзеных пад культуру гектараў. “Максімальнай ураджайнасці для нашых зямель сёлета ў любым выпадку не атрымаем, — дзеліцца кіраўнік акцыянернага таварыства Сяргей Тарабуеў. — Паўплывала надвор’е. З-за працяглай спякоты пасевы ў некаторых месцах падгарэлі. Не адбылося кушчэння раслін — не развіліся бакавыя адросткі, а толькі сцябло”.

Алег Аляксандравіч Рыдзеўскі ў гаспадарцы “старажыл”: працоўны стаж складае не меней за тры дзясяткі год.

Спадзяванні ў аграрыеў на другое, ніжэйшае рапсавае поле. Да яго ўборкі толькі прыступілі, і ўжо цяпер зразумела, што болей ура­джайнае.

Сабранае насенне “Аграмашсервіс” пастаўляе на Бабруйскі КХП у лік дзяржзаказу. Даведзены на сёлетні год план унушальны — 350 тон, з-за ўнесенай надвор’ем карэкціроўкі яго выкананне ў гаспадарцы ставяць пад сумненне.

Віталій Валер’евіч Падшывалаў услед за дырэктарам прызнае, што ўраджай рапсу на полі, дзе вялася ўборка, незавідны.

Пры гэтым задачу паставілі — якасна сабраць не толькі насенне, але і рапсавую салому. У мэтах апошняга побач з камбайнамі, якія малоцяць рапс, працуе КВК. Здроб­леную ім салому трактары адвозяць у траншэю на жывёлагадоўчую ферму для наступнага змешвання з сіласам і сенажом — выкарыстання ў якасці корму скаціне.

Аляксандр Барысавіч Нічыпаловіч на трактары “Беларус-1523” у звязцы з ПІМам (на фота) і Аляксандр Анатольевіч Лаўрыновіч перавозяць салому ў траншэю на тэрыторыі фермы. Як і калегі, разлічваюць на добры заробак у гарачую ўборачную пару

На полі за в. Вялічкава ў дзень нашага наведвання працавалі два камбайны КЗС-12. У дадатковай тэхніцы, па словах дырэктара, патрэбы пакуль не было. Камбайнеры Алег Рыдзеўскі і Віталь Падшывалаў, гэтак жа як і Сяргей Фралоў на КВК, і трактарысты-перавозчыкі саломы, работу сваю ведаюць і выконваюць сумленна. Тым болей што ад гэтага залежыць заробак механізатараў.

Сяргей Юр`евіч Фралоў на КВК падбірае і здрабняе рапсавую салому.

Алена КАРПЕНКА. Фота Іллі КАСЬКО.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.