Пачаўся ён з сянажнай траншэі на ўскрайку в. Лысая Горка, дзе без супынку “шнураваў” трактар “Кіравец”. На просьбу спыніцца механізатар не адрэагаваў, выразна даючы зразумець, што на размовы часу аніякага.

Выручыла брыгадзір паляводчай брыгады №2 Таццяна Іванько (на здымку). Ад яе і даведаліся, што за штурвалам “Кіраўца” на працягу дня працуе Аляксандр Дзмітрыевіч Каталосаў. Ноччу трактарыста на гэтай адказнай рабоце змяняе напарнік Уладзімір Анатольевіч Бубіч. Сама ж Таццяна кантралюе ход работ на аб’екце, пазначае рэйсы перавозчыкаў зялёнай масы, непасрэдна якасць трамбоўкі ў траншэі. У гаспадарцы дзяўчына трэці год, працоўныя абавязкі добра ведае і не пагарджае імі. Работай у саўгасе “Кісялевічы” жыхарка аг. Леніна ў цэлым задаволена.

На сенажаці непадалёк Бібкаўшчыны падборкай і здрабненнем травы на айчынным кормаўборачным агрэгаце “Палессе” займаўся механізатар, чыё імя нярэдкае на Дошчы гонару “раёнкі” — Аляксандр Рыгоравіч Зорын. На давераным яму ў свой час новенькім КЗРы Аляксандр працуе сёмы сезон і работай тэхнікі цалкам задаволены. У гаспадарцы (колішнім саўгасе Леніна) герой радкоў з 2002 года. Прыйшоў сюды адразу пасля заканчэння мясцовай школы. З таго часу займеў сям’ю (жонка Наталля працуе ў гэтай жа гаспадарцы), дзве дачушкі і лічыць, што жыццё задалося.

Каб тэхніка Аляксандра была ў дзеянні, на сенажаці — Уладзімір Уладзіміравіч Лысянкоў на трактары МТЗ-82 з валкаўтваральнікам ГР-700. Нягледзячы на пенсійны ўзрост, Уладзімір Уладзіміравіч працягвае дапамагаць гаспадарцы, з якой звязаў сваё жыццё ў далёкім, як цяпер здаецца, 1974 годзе. Спачатку быў вадзіцелем, а ў 1991-ым перасеў на трактар ды так і застаўся працаваць на ім. Мой суразмоўца — жыхар таксама мясцовы. У пас. Леніна вырас, скончыў школу, пабудаваўся, тут працаваў і працуе і ніколькі не шкадуе, што лёс для яго склаўся менавіта так. Бо ўпэўнены: малая радзіма — не проста словы, гэта духоўная і душэўная падсілкоўка чалавека. Зрэшты, двое сыноў (усяго іх у бацькі тры) Уладзіміра Уладзіміравіча таксама працуюць у сельскай гаспадарцы. Адзін – намеснікам старшыні ў СВК “Гігант”, другі механізатарыць у адной з бацькам гаспадарцы. Сам ён, як з усмешкай заўважае, — трактарыст-універсал: працуе і на граблях, і на прэсе, выконвае любыя іншыя сельскагаспадарчыя справы. “Праца — гэта дзеянне, — лічыць Уладзімір Лысянкоў, — а дзеянне — гэта жыццё”.

* * *
Па стану на раніцу ўчарашняга дня, як паведамілі ў райсельгасхарчы, сена ў ААТ “Саўгас Кісялевічы” нарыхтавалі 145 тон ці 26% ад патрэбнага аб’ёму, сенажу — 2000 тон (31%), у тым ліку 159 тон у палімерную ўпакоўку.

Алена КАРПЕНКА. Фота Іллі КАСЬКО.