III форум “Роль рэгіянальных СМІ ў развіцці сацыяльнага партнёрства”, арганізаваны Федэрацыяй прафсаюзаў Беларусі сумесна з Міністэрствам інфармацыі Рэспублікі Беларусь, працаваў на мінулым тыдні ў Мінску.

Яго мэтай было садзеянне ўзаемадзеянню паміж журналістамі і прафсаюзамі ў мэтах асвятлення работы апошніх, абмеркаванне надзённых задач, накіраваных на забеспячэнне правоў і законных інтарэсаў працаўнікоў, над вырашэннем якіх гэтым часам працуюць прафсаюзы.

Журналісты прынялі ўдзел ва ўрачыстым адкрыцці прафсаюзнай турыстычнай выставы “Прафтур-2018”, наладжанай у Рэспубліканскім палацы культуры прафсаюзаў. Адкрываючы яе, старшыня ФПБ Міхаіл Орда заакцэнтаваў увагу на значнасці для Беларусі развіцця ўнутранага і ўязнога турызму, здольнага прыцягнуць у краіну дадатковыя грашовыя сродкі. Адначасова з эканамічнай выгодай ад турызму назваў садзеянне занятасці насельніцтва — стварэнне дадатковых працоўных месцаў. І для гэтага, па яго словах, у краіне шмат што зроб­лена: на тэрыторыі Беларусі маецца 13 толькі прафсаюзных здраўніц з шырокім спектрам медыцынскіх паслуг, распрацавана і дзейнічае больш за 100 марштураў па ўнікальных у ландшафтным, культурным і гістарычным плане месцах. І гэтую інфармацыю, як ён адзначыў, неабходна актыўна даводзіць да жыхароў краіны і замежжа.

Падчас плянарнага пасяджэння, якое прайшло ў Рэспубліканскім доме прафсаюзаў і дзе да работнікаў СМІ далучыліся кіраўнікі абласных, раённых, гарадскіх, а таксама галіновых аб’яднанняў прафсаюзаў, адбыўся адкрыты дыялог паміж сацыяльнымі партнёрамі. Пры гэтым Міхаіл Орда нацэліў прысутных на яго адкрытасць, адсутнасць няёмкіх тэм. Размова вялася пра наладжванне больш цеснага супрацоўніцтва паміж прафлідарамі і журналістамі ў мэтах асвятлення работы грамадскай арганізацыі, стваральнай працы людзей; пра ініцыятывы Федэрацыі прафсаюзаў ураду, у тым ліку па ўдасканаленні пенсійнага забеспячэння; пра Дэкрэт №1 Прэзідэнта Рэспублікі Беларусь, які, па меркаванні старшыні ФПБ, будзе садзейнічаць легалізацыі людзей на рынку працы. Начальнік упраўлення інфармацыйна-аналітычнай работы Міністэрства інфармацыі Таццяна Хмель нацэліла журналістаў на павелічэнне “прывабнасці” сродкаў масавай інфармацыі, завастрыла ўвагу на ролі электронных СМІ, іх прысутнасці ў сацсетках. Намеснік старшыні ФПБ Алена Манкевіч, разам з іншым, спынілася на спосабах супрацьстаяння інфармацыйным укідкам, сеткавым тролям, дала рэкамендацыі па недапушчэнні канфліктаў на форумах.

Па традыцыі спікеры адказалі на пытанні журналістаў. Апошнія датычыліся работы прафсаюзаў па ўдасканаленні пенсійнага забеспячэння, кантрактнай формы найму працаўнікоў, матэрыяльнага стымулявання работнікаў СМІ, настаўніцтва на вытворчасці і інш.

Прыемным момантам форуму стала ўзнагароджанне работнікаў сродкаў масавай інфармацыі, чыя праца ў асвятленні прафсаюзнай тэматыкі па выніках 2017 года прызнана найбольш плённай. Сярод удастоеных Ганаровай граматы Міністэрства інфармацыі і журналіст нашай газеты — загадчыца аддзела сельскай гаспадаркі Алена Карпенка.

Уласн. інф.