Вынікі работы за 2017 год і задачы на бягучы абмеркавалі работнікі філіяла “Агракамбінат КХП” ААТ “Бабруйскі камбінат хлебапрадуктаў”. Справаздачны сход, удзел у якім прыняў і старшыня райвыканкама Павел Найдзён, прайшоў у чацвер на мінулым тыдні ў актавай зале Гарбацэвіцкага СДК.

Даючы характарыстыку папярэдняму сельскагаспадарчаму году, дырэктар філіяла Аляксандр Атрохаў падзякаваў за працу калектыў, стараннем якога ўдалося прыкметна палепшыць асноўныя вытворчыя паказчыкі. У прыватнасці, павялічылі (134% да папярэдняга года) вытворчасць малака, якая склала 6 634 т, рэалізацыю малака (131,2%), удой на карову (130%) — надаілі 4 675 кг. Нядрэнна спрацавалі па мясным накірунку жывёлагадоўлі — сярэднесутачныя прывагі буйной рагатай жывёлы на вырошчванні склалі 629 г (106%), на адкорме БРЖ — 761 г. Болей чым удвая павялічылі вытворчасць яек. Нягледзячы на нялёгкае матэрыяльнае становішча, пры фінансавай падтрымцы ААТ “Бабруйскі камбінат хлебапрадуктаў”, шмат будавалі — добраўпарадкоўвалі малочна-таварныя фермы, свінафермы, право­дзілі рэканструкцыю МТФ у в. Каменка, птушнікаў, куды набылі сучаснае абсталяванне. У мэтах больш якаснага захавання тэхнікі і эканоміі паліўных рэсурсаў распачалі работы па аднаўленні дзейнасці машынна-трактарнага ўчастка в. Гарохаўка, інш.

Пры гэтым Аляксандр Атрохаў указаў на недапрацоўкі і страчаную матэрыяльную выгоду ад іх. Гэта і непрадукцыйнае выбыццё жывёлы, і далёкія ад ідэальных паказчыкі якасці рэалізуемага малака (гатункам “экстра” хоць і павялічылі, аднак недастаткова — 53% ад агульнага аб’ёму), нерэнтабельнасць прадукцыі свінагадоўлі. І прычыны, па словах дырэктара, у “чалавечым” фактары — грубым парушэнні тэхналагічных патрабаванняў работнікамі і недастатковым кант­ролі за вытворчым працэсам з боку спецыялістаў.

Не дала чакаемай аддачы раслінаводчая галіна. Нягле­дзячы на прадпрынятыя меры і сумленную работу механізатараў, ураджайнасць збожжавых не парадавала. Паўплывала на гэта, як было адзначана, у тым ліку спецыфіка зямель — нізкая ўрадлівасць глебы, недастатковасць унесеных мінеральных угнаенняў, аддаленасць палёў (сельгасугоддзі філіяла складаюць звыш 18 000 га) і звязаныя з гэтым нязручнасці.

Гаворачы пра задачы на сёлетні год — павелічэнне вытворчасці прадукцыі па ўсіх накірунках дзейнасці, павелічэнне выручкі і, галоўнае, выхад на прыбытак (па выніках 2017 года філіял спрацаваў “у нуль”, палепшыўшы тым самым “мінусавы” вынік 2016-га), Аляксандр Атрохаў заўважыў, што для гэтага ў гаспадарцы маецца ўсё неабходнае. Справа — за строгім выкананнем тэхналогій, і ў гэтым плане вядзецца няўхісная работа з работнікамі ўсіх узроўняў. У мэтах вырашэння кадравага пытання, прыцягнення на вытворчасць маладых спецыялістаў (такая задача пастаўлена галаўным прадпрыемствам) запланаваны будаўніцтва і аднаўленне жылля.

Сваімі меркаваннямі адносна прычын, якія не прывялі да станоўчага эканамічнага выніку, і планамі па іх пераадоленні ў новым сельскагаспадарчым годзе падзяліліся галоўныя спецыялісты — аграном М.М. Атрохова, вет­урач С.М. Мянькоўскі, заатэхнік В.Г. Васілеўская. Лідар прафсаюзнай “пярвічкі” Н.М. Дудаль зрабіла раскладку выдаткаванняў грамадскіх сродкаў і адзначыла, што ўсе пункты калектыўнага дагавору выконваліся.

Указаўшы на тое, што філіялам у мінулым годзе зроблена нямала, акрэсліўшы стратэгічныя задачы “Агракамбіната КХП” на 2018 год, Павел Най­дзён заўважыў, што іх вырашэнне — абавязак не толькі кіраўніцтва, але ўсяго калектыву, і прыступаць да яго выканання трэба неадкладна — праз павелічэнне вытворчасці працы, паляпшэнне выканаўчай і працоўнай дысцыпліны, трывалае ўкараненне тэхналогій на кожным з відаў вытворчасці. Прычым арыенцірам у рабоце калектыву, па словах кіраўніка раёна, павінны стаць прыбыткі. Дзякуючы ім гаспадарка зможа стабільна функцыяваць і развівацца, а работнікі — атрымліваць годную заробную плату.

Падчас сходу лепшым з лепшых працаўнікоў палёў і ферм, спецыялістам, чыя работа ў 2017 годзе прызнана найболей паспяховай і выніковай, былі ўручаны граматы і ўдзячнасці ААТ “Бабруйскі камбінат хлебапрадуктаў” і філіяла “Агракамбінат КХП”.

Падарункам для аграрыяў стала і канцэртная праграма, наладжаная артыстамі раённага Цэнтра культуры і мясцовага СДК.

Алена КАРПЕНКА. Фота Іллі КАСЬКО.