Тваё здароўе — тваё права
У межах акцыі “Сябруем з законам”, якая праходзіць на тэрыторыі раёна ў першай палове месяца, і ў сувязі з тым, што 1 снежня па ўсёй рэспубліцы адзначалі Дзень барацьбы са СНІДам, у Брожскай сярэдняй школе ў мінулую пятніцу прайшло мерапрыемства “Тваё здароўе — тваё права”.
Арганізатарамі адкрытага дыялогу са старшакласнікамі выступілі камісія па справах непаўналетніх Бабруйскага райвыканкама, раённы камітэт ГА “БРСМ” і Бабруйская гарадская паліклініка №2. Удзел прынялі намеснік старшыні КСН Наталля Праташчык, лідар моладзевай арганізацыі Вераніка Падаляк, урач-гінеколаг Таццяна Карпава, а таксама дырэктар школы Аляксандр Ёшчык.
Тэм падчас мерапрыемства падымалася шмат. Усе яны былі паміж сабой звязаны, накіраваны на тое, каб падлеткавае жыццё, а затым і дарослыя гады юнакоў і дзяўчат не былі азмрочаны неабдуманымі ўчынкамі.
Наталля Праташчык засяродзіла ўвагу непаўналетніх на недапушчэнні імі супрацьпраўных паводзін, неабходнасці выканання нормаў адміністрацыйнага і крымінальнага права. Прывяла не адзін прыклад таго, як “несяброўства” з законам у юныя гады негатыўна паўплывала на далёйшы лёс колішніх вучняў. Ужыванне спіртаўтрымліваючых напояў, парушэнне правілаў распарадку школьніка, правілаў дарожнага руху, дапушчэнне іншых супрацьпраўных учынкаў — тое, чаго дапускаць нельга, каб адчуваць сябе паўнавартасным чалавекам, каб такім цябе ўспрымалі іншыя, каб не згубіць ніводнага шанцу на шляху да маральнага і матэрыяльнага задавальнення.
Шмат гаварылася пра тое, што шчаслівы чалавек — здаровы чалавек. А вытокі апошняга — у здаровым ладзе жыцця: правільным харчаванні, уменні адэкватна рэагаваць на стрэсавыя сітуацыі, весці правільнае палавое жыццё. У чым сэнс апошняга, а разам з тым — што такое ВІЧ-інфекцыя, як не заразіцца на яе, што рабіць і куды звяртацца, каб своечасова выявіць хваробу і супрацьстаяць ёй, даходліва патлумачыла Таццяна Карпава, выкарыстаўшы для гэтага мультымедыя.
У падвядзенне вынікаў сустрэчы школьнікаў са спецыялістамі Вераніка Падаляк выказала спадзяванне, што адкрытая размова будзе мець станоўчы вынік — старшакласнікі змогуць правільна растаўляць жыццёвыя прыярытэты. Засяродзіла ўвагу на тым, што для здороўя — фізічнага і духоўнага, карысна займацца спортам і абавязкова мець мэту — цудоўны арыенцір, які зробіць жыццёвую дарогу насычанай і не дасць саступіцца з яе.
Алена КАРПЕНКА. Фота аўтара.