Сёння, у трэцюю па ліку лістападаўскую нядзелю работнікі сельскай гаспадаркі і перапрацоўчай галіны адзначаюць прафесійнае свята і, як традыцыйна склалася, — падводзяць вынікі сельскагаспадарчага года. Для некаторых — папярэднія, бо тую ж бульбу яшчэ трэба прадаць. Як спрацавалі аграрнікі сёлета: чаго ўдалося дасягнуць, над чым узмоцнена прыдзецца папрацаваць у далейшым, — у інтэрв’ю з начальнікам райсельгасхарча А.М. Сідарэнка (на фота).

— Аляксадр Мікалаевіч, лёгкім ці складаным выдаўся для работнікаў галіны сёлетні год, з якімі вытворчымі паказчыкамі падыйшлі вы да прафесійнага свята?

— Для работнікаў сельскагаспадарчай галіны год не бывае лёгкім у прынцыпе. Так было і спрадвеку, так і цяпер, нягледзячы на мадэрнізацыю вытворчасці: занадта шмат фактараў, якія ўплываюць на вынікі работы ў галіне, і ў першую чаргу — надвор’е. Аднак многага вартае старанне людзей — імкненне сельскагаспадарчых калектываў, кожнага работніка на сваім працоўным месцы павялічыць аб’ёмы вытворчасці прадукцыі, палепшыць тым самым уласны і раёна дабрабыт. Калі гаварыць мовай лічбаў, то вытворчасць валавой прадукцыі за студзень-кастрычнік у суадносных цэнах 2016 года ў сельскагаспадарчых арганізацыях склала 53 464,5 тыс. руб­лёў, або 109,4% да аналагічнага перыяду мінулага года. У тым ліку раслінаводства — 26 065 тыс. рублёў (тэмп росту — 108,6%), жывёлагадоўлі — 27 399 тыс. рублёў (110,1%). Найбольшых тэмпаў росту дасягнулі філіял “Варатынь” ААТ “БЗТДіА” — 124,6% і філіял “Харчавік-Агра” ААТ “Чырвоны харчавік” — 114,6%. Вышэй ўзроўню мінулага года спрацавалі СВК “Гігант”, філіял “Агракамбінат КХП” ААТ “Бабруйскі камбінат хлебапрадуктаў”, ААТ “Неўскі-Агра”, ААТ “Міхалёўская Ніва”.

Вытворчасць малака па выніках 10 месяцаў склала 27 004 т або 114,1% да аналагічнага перыяду мінулага года, у тым ліку за кастрычнік — 2 490,1 т­ (116,7%). Таварнасць — 90%, непасрэдна за кастрычнік — 90,5. Станоўчую дынаміку ў параўнанні да папярэдняга года мае і ўдой на адну карову. Дадзены паказчык склаў 3 068 кг на адну галаву (+561 кг да 2016 г.). Сярэднесутачныя прывагі буйной рагатай жывёлы (БРЖ) павялічыліся на 188 г і склалі 571 г з пачатку года. На 1 483 галавы за гэты перыяд вырасла пагалоўе БРЖ і складае на сёння 24 923. Станоўчае і тое, што ў параўнанні да папярэдняга года кароў сёлета расцялілася на 1 022 галавы болей. Па выніках года плануем стабілізаваць да мінулагодняга ўзроўню паказчык пагалоўя малочных кароў (8 812 галоў), які на гэты час пакуль у адмоўнай дынаміцы (-408 галоў). Немалаважным з’яўляецца тое, што вытворчасць буйной рагатай жывёлы і птушкі на 1 балагектар сельгасугоддзяў павялічылася да ўзроўню мінулага года на 22% і склала 1,86 кг, вытворчасць малака — на 17% (14,2 кг на 1 балагектар). Каб ісці ў ногу з часам, жывёлаводчы комплекс мадэрнізуецца. У шэрагу сельгасарганізацый вя­дзецца рэканструкцыя і будаўніцтва жывёлагадоўчых памяшканняў, што таксама станоўча ўплывае на ход спраў у да­дзенай галіне.

Добра папрацавалі раслінаводы. Вага раённага караваю (без кукурузы) — 34 620 т. Ураджайнасць зерневых і зернебабовых з аднаго гектара склала 26,2 цэнтнера. Плюс да гэтага намалацілі кукурузы болей за 2 000 т пры сярэдняй ураджайнасці 72,6 ц/га, рапсу — 4 370 (20,6 ц/га). Бульбы накапана 15 640 тон (206 ц/га). Звыш 1,5 тыс. т сабралі гародніны, болей за 17 тыс. т (258 ц/га) — цукровых буракоў.

— Развіццё аграрнай галіны характарызуюць у тым ліку ўплачаныя сельгаспрадпрыемствамі падаткі…

— Гэта так, і нам тут ёсць што ска­заць. На 1 гектар сельгасугоддзяў за 9 месяцаў уплачана 28 рублёў прамых падаткаў (4-е месца ў вобласці, паказчык вышэйшы за сярэднеабласны), а такім сельгаспрадпрыемствам, як філіял “Агракамбінат КХП” ААТ
“Бабруйскі камбінат хлебапрадуктаў” — 57,8 рублёў на 1 гектар (5-е месца ў вобласці сярод усіх сельгаспрадпрыемстваў).

— З улікам скарачэння дзяржпадтрымкі і выйсця прадпрыемстваў на самаакупнасць асабліва востра паўстае праблема эфектыўнасці вядзення сельгасвытворчасці, стварэнне дадатковай дабаўленай вартасці…

— Мы ў дадзеным накірунку рухаемся ўпэўнена. Выручка ад рэалізацыі сельгаспрадукцыі за 9 месяцаў у раёне вырасла на 23,4% да ўзроўню мінулага года і склала 37 603 тыс. рублёў. Аб’ёмы вытворчасці павялічыліся на 9,1%, пры тым што затраты знізіліся на 4,8% і склалі 95,2% да ўзроўню папярэдняга года. Гэта значыць, фактычнае зніжэнне затрат склала 12,8% (сярэднеабласны паказчык — 3,2%).

Немалая работа праводзіцца ў раёне па паляпшэнні плацёжаздольнасці сельгаспрадпрыемстваў. Ажыццяўляюцца мерапрыемствы па выйсці асобных гаспадарак на плацёжаздольнасць. Калі яшчэ летась за 9 месяцаў у цэлым па аграрным сектары было 3,5 млн. рублёў страт, то сёння выйшлі на станоўчы вынік (+397 тыс. рублёў прыбытку). У мінулым годзе па канчатковым выніку стратнымі былі 5 сельгаспрадпрыемстваў, цяпер іх засталося 2. Праводзяцца мерапрыемствы па выйсці і гэтых прадпрыемстваў на бясстратную работу. Тым болей што апошняму садзейнічае і Указ Прэзідэнта Рэспуб­лікі Беларусь №253 “Аб мерах па фінансавым аздараўленні сельгасарганізацый”, якім прадугледжана шэраг ільгот і адтэрміновак па выкананні абавязацельстваў неплацёжаздольнымі прадпрыемствамі.

— Дзейнасць сельгасвытворчасці палепшылася, але ці выраслі ад гэтага заробкі ў работнікаў галіны?

— На гэта адзначу, што сярэднемесячная заработная плата за 10 месяцаў, у параўнанні з адпаведным перыядам мінулага года, у раёне вырасла на 16,3% і склала 475,4 руб. Прадпрымаем усё магчымае дзеля далейшага руху ў гэтым накірунку.

— Аляксандр Мікалаевіч, напярэдадні прафесійнага свята што б хацелі пажадаць работнікам сельскай гаспадаркі і перапрацоўчай прамысловасці?

— Найперш хачу выказаць усім словы падзякі за нялёгкую, але такую патрэбную справу — садзеянне забеспячэнню харчовай бяспекі краіны. А віншаванні? Вядома ж, здароўя і паспяховай працы. Спрыяльнага надвор’я, дабрабыту, узаемапаразумення і любові ў сем’ях.

Размову вяла Алена КАРПЕНКА. Фота Генадзя БАГДОНАСА.