Якасна захаваная тэхніка аддзячыць доўгай службай
Па меры таго як палявыя работы завяршаюцца, тэхніку, што прымала ў іх удзел, ставяць на зімовае захаванне. Каб яно было якасным, патрабуецца выкананне цэлага комплексу адпаведных мерапрыемстваў. І тут важна не прапусціць ніводнага фактару, які б садзейнічаў псаванню тэхнікі.
Падрабязнаму аналізу такіх момантаў і быў прысвечаны раённы семінар-нарада, які напрыканцы мінулага тыдня прайшоў на базе Бабруйскага ААТ “Аграмашсервіс” — на машынным двары в. Слабада. Узначаліў мерапрыемства намеснік начальніка вытворчага аддзела ўпраўлення сельскай гаспадаркі і харчавання райвыканкама Яўген Бярозкін. Удзел прынялі вядучы інжынер-інспектар Дзяржтэхнагляду Аляксандр Сапега, галоўныя інжынеры раённых сельгаспрадпрыемстваў.
Акцэнт падчас семінару быў зроблены на правілы пастаноўкі тэхнікі на зіму ў адпаведнасці з дзяржаўнымі стандартамі. Гэтую тэму ўзгадалі не толькі тэарэтычна, але і практычна: дасканала агледзелі кожную з пастаўленых на захаванне сельгасмашын “Аграмашсервіса”, зрабілі дэтальны аналіз дапушчаных памылак і адхіленняў ад патрабаванняў. Увага прысутных была скіравана на немалаважны фактар эканоміі сродкаў — пастаноўку тэхнікі тут ажыццявілі ў кароткі тэрмін з выкарыстаннем мінімальных грашовых выдаткаў.
Варта адзначыць, што да ліку тэхнікі, якая на гэтую пару павінна чакаць новага сельскагаспадарчага сезону на машынных дварах гаспадарак падрыхтаванай, адносяцца сеялкі (у тым ліку пасяўныя агрэгаты), частка плугоў, культыватараў, складаная тэхніка, у прыватнасці, зернеуборачныя камбайны. Калі браць у цэлым па раёне, то, як адзначыў Яўген Бярозкін, работа ў дадзеным накірунку праведзена немалая. Тыдзень-два — і на захаванне будуць пастаўлены ўсе машыны і агрэгаты, патрэба ў якіх у сёлетнім сельскагаспадарчым годзе адпала. А абмеркаваныя падчас семінару недапрацоўкі, па словах намесніка начальніка вытворчага аддзела, дадуць магчымасць падыйсці да гэтага больш якасна.
Зрэшты, з 1 лістапада пачаўся сезон рамонту тэхнікі. У гаспадарках вядзецца падрыхтоўка майстэрань да работы ў зімовы перыяд, у першую чаргу — уцяпленне памяшканняў, наладжванне ацяпляльнага абсталявання.
Увага ўдзельнікаў семінару была скіравана таксама на тое, што з сёлетняга года на базе “Аграмашсервіса” — у Бабруйску па вул. Арджанікідзе — арганізавана працяглае захаванне акумулятарных батарэй, дзеля гэтага створаны ўсе ўмовы. Паслуга платная, аднак, як было адзначана, вартая таго, каб ёй скарыстацца: увесну не прыдзецца шукаць новыя батарэі.
Алена КАРПЕНКА. Фота Юрыя ЮРКЕВІЧА.