У філіяле «Варатынь» мадэрнізуецца жывёлагадоўчы комплекс
Актыўнымі тэмпамі мадэрнізуецца жывёлагадоўчы комплекс філіяла “Варатынь” ААТ “БЗТДіА” (дырэктар У.В. Давыдзенка).
У кастрычніку на малочна-таварнай ферме №1 аграгарадка ў строй уведзены прафілакторый для цялятак на 108 галоў. У адпаведнасці з тэхналогіяй вырошчвання маладняку, нованароджаныя бычкі і цялушкі тут будуць утрымлівацца да 3-хмесячнага ўзросту — вагі не меней за 100-110 кг. Умовы для жывёлы ў новай будыніне створаны камфортныя. У кожнага цяляці — індывідуальны домік і посуд: для вады і малака, розных відаў сухога корму. Да адкрыцця прафілакторыя гаспадарка набыла сучасную ўстаноўку для пастэрызавання малака на 200 літраў ці, як спрошчана называюць агрэгат, — “малочнае таксі”, што дазваляе павысіць якасць карыснага напою.
У першай палове лістапада жывёлай напоўніўся і рэканструяваны хлеў на 200 галоў на МТФ №3 в. Коўрын (ад былой пабудовы засталіся толькі сцены і дах). Утрыманне жывёлы з некалі прывязнога тут пераабсталявалі на беспрывязное, унутраныя канструкцыі замянілі на сучасныя металічныя, памянялі падлогу. Хлеў прызначаны для цялушак, якія сюды будуць трапляць пасля новаўведзенага прафілакторыя і перыяду дарошчвання на МТФ в. Данілаў Мост. На Коўрыне будучых прадстаўніц дойнага статку плануюць утрымліваць аж да пары асемянення.
У філіяле ўжо цяпер дбаюць пра будучых рагуль, ствараючы для гэтага ўсе неабходныя ўмовы. Да ліку такіх мерапрыемстваў адносіцца і будаўніцтва асобнага сучаснага радзільнага аддзялення для кароў на 262 галавы на малочна-таварным комплексе гаспадаркі, прызначанага для сухастойных кароў 1 і 2 перыядаў, рагуль падчас расцёлу, а таксама 30 месцаў — для наступнага раздою кароў. Будаўнічыя работы на аб’екце вядуцца поўным ходам. Задзейнічаны ў іх таксама і завадчане.
Алена КАРПЕНКА. Фота Юрыя ЮРКЕВІЧА.