Умей працаваць і… адпачываць

Восеньскія палявыя работы ў асноўным завершаны, не кажучы ўжо пра “гарачую” пару ўборкі хлябоў. Таму працаўнікам сельгасвытворчасці, якія ў іх былі задзейнічаны, ды і работнікам іншых сфер — актыўным дачнікам, самы час паклапаціцца пра адпачынак.

Аб тым, што чалавеку, каб добра сябе адчуваць, трэба ўмець спалучаць працу з адпачынкам, сцвярджаюць і псіхолагі, і медыкі. Яны ж сыходзяцца ў меркаваннях і адносна таго, што падчас водпуску добра не толькі аздаравіцца — аднавіцца фізічна, але і атрымаць як мага болей прыемных уражанняў. І тое, і другое гарантуюць беларускія здраўніцы, дзе для членаў прафсаюзаў маюцца прэферэнцыі. Якія? Пра гэта ў інтэрв’ю са старшынёй Бабруйскага раённага аб`яднання прафсаюзаў Людмілай Крычко.

Людміла Васільеўна, якую дапамогу здольны аказаць прафсаюзы для членаў арганізацыі, якія толькі плануюць свой адпачынак?

— Пачну з таго, што задача прафсаюзаў — стаяць на варце працоўных правоў і сацыяльна-эканамічных інтарэсаў сваіх членаў, удзельнічаць ва ўсіх сферах працоўнага жыцця работнікаў. І, вядома ж, той, хто добра працуе, добра і адпачывае. Чалавек павінен клапаціцца пра сваё здароўе. практычна ва ўсіх калектыўных дагаворах ёсць пункты, якія прадугледжваюць матэрыяльныя выплаты да водпуску на адпачынак і аздараўленне. І адзін раз на год чалавек гэтае можа скарыстаць. Гэта дадатковая выплата да заробку, за кошт якой можна павысіць якасць свайго адпачынку, каб пасля з новымі сіламі, шчаслівым і здаровым ізноўку прыступіць да новых задач на рабоце. Да прыкладу, у калектыўным дагаворы ДЛГУ “Бабруйскі лясгас” працаўнікам, якія вырашаюць адпачыць у прафсаюзных здраўніцах, па 2 базавыя велічыні выдаткоўваецца за кошт сродкаў прафкама і па 3 — за кошт наймальніка. Для аздараўлення дзяцей работнікаў у лагерах такая зніжка складае 50%, а для дзяцей са шматдзетных сем’яў і ўсе 100%.

Можа, параіце, і дзе лепей правесці адпачынак? Якой аздараўленчай установе аддаць перавагу?

— Асабіста я параіла б правесці адпачынак у прафсаюзных здраўніцах. У іх не толькі камфортныя ўмовы пражывання, але і маецца спектр медыцынскіх і касметалагічных працэдур, чым асабліва цікавяцца нашыя жанчыны. Тым болей, што ўсе яны прадугледжваюць для членаў прафсаюза і іх дзяцей зніжку ў 25%! Пагадзіцеся, надзвычай добрая эканомія!

Пры тым, што адпачынак камфортны, насычаны, скіраваны на аздараўленне?

— Так. Ды і ехаць далёка не трэба. 13 прафсаюзных санаторыяў знаходзяцца ва ўсіх абласцях краіны. Можна выбраць патрэбны вам профіль лячэння: захворванняў дыхацельнай, сардэчна-сасудзістай сістэм, неўралагічнага накірунку і гэтак далей. Усюды працуе высока­кваліфікаваны персанал, практычна ва ўсіх, акрамя свежага паветра і маляўнічых краявідаў, маюцца карысныя мінеральныя воды і лячэбная гліна.

Цудоўным прыкладам прафсаюзнай здраўніцы, якая карыстаецца высокім попытам у жыхароў краіны і замежжа, з’яўляецца санаторый Леніна на Бабруйшчыне. Лячэбны профіль установы — гастра­энтэралогія, неўралогія, гінекалогія, уралогія, захворванні апорна-рухальнага апарата.

Да гэтага хачу дадаць, што паехаць на адпачынак і аздараўленне можна як аднаму, так і ўсёй сям’ёй.

Ну а я на заканчэнне хачу запытацца, ці клапоціцца прафсаюз пра адпачынак працаўнікоў у час, не звязаны з іх водпускам?

— Вядома ж. Мы імкнемся прапанаваць людзям варыянты змястоўнага, актыўнага адпачынку і на працягу ўсяго года — у выхадныя дні. З гэтай мэтай для работнікаў у працоўных калектывах арганізоўваюцца паездкі, экскурсіі, спартыўныя і забаўляльныя мерапрыемствы. Бо, акрамя таго, што сумеснае баўленне вольнага часу аб’ядноўвае калектывы, кожнаму ўдзельніку дорыць добры настрой, натхняе на стваральную працу. У прыклад хачу прывесці спартыўны турнір па футболе сярод маладзёжных каманд устаноў і прадпрыемстваў, арганізаваны сумесна нашым раённым і Бабруйскім гарадскім аб’яднаннем прафсаюзаў увесну гэтага года. Мерапрыемства стала сапраўдным святам не толькі для саміх яго ўдзельнікаў, але і для членаў іх сямей, якія прыйшлі падтры­маць сваіх мужоў, тат, братоў. І гэты прыклад не адзінкавы.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.