Сяргей Мянькоўскі, галоўны ветэрынарны ўрач філіяла “Агракамбінат КХП” ААТ “Баб­руйскі камбінат хлебапрадуктаў”, у сельскагаспадарчай галіне раёна чалавек не новы — на працягу не аднаго года ўзначальваў раённую жывёлагадоўлю. Ён з тых нешматлікіх, трэба прызнацца, гараджан, хто, сутыкнуўшыся аднойчы з вяс­ковым жыццём, назаўсёды аддаў яму перавагу.

Нарадзіўся Сяргей Мікалаевіч у Бабруйску. Пасля заканчэння Віцебскай дзяржаўнай ветэрынарнай акадэміі быў размеркаваны ва УКВП “Саўгас “Бабруйскі”. Працавітасць маладога спецыяліста, ягонае імкненне спазнаць у прафесіі як мага болей ацанілі ў гаспадарцы і, каб замацаваць на вёсцы, не толькі даверылі пасаду галоўнага ветурача, але і вылучылі добраўпарадкаванае жыллё ў Гарбацэвічах. З таго часу — яшчэ да службы ў арміі — і пачалося вясковае жыццё Сяргея Мянькоўскага, пра якое ён, як прызнаецца, ні разу за 15 год не пашкадаваў. Болей таго — да жыцця на вёсцы схіліў і будучую жонку-гараджанку.

— У нашым аграгарадку дастаткова развітая інфраструктура, маюцца ўсе тыя даб­роты, што і ў бабруйчан, — заўважае мой субяседнік. — Плюс да гэтага — дэфіцытныя ў горадзе прастора, свежае паветра, размеранасць жыцця. Дый сам горад пад бокам. Пры наяўнасці аўтамабіля дабярэш­ся да яго цэнтра хутчэй, чым, скажам, з 7 мікрараёна Бабруйска.

У размове пра працоўныя будні Сяргей Мянькоўскі звяртае ўвагу на спецыфіку работы менавіта ў філіяле “Агракамбінат КХП”. З-за буйной плошчы гаспадаркі, шматлікасці жывёлагадоўчых аб’ектаў і іх раскіданасці яму як галоўнаму ветурачу шмат увагі даводзіцца надаваць арганізацыйнай рабоце. У штаце 8 спецыялістаў такога ж профілю, маецца патрэба яшчэ ў пяці. Да падбору кадраў у філіяле адносяцца надзвычай сур’ёзна: ад іх работы напрамую залежаць вынікі ў жывёлагадоўлі. І прыналежнасць да вёскі ў разлік не бяруць — галоўнае, каб чалавек быў сумленным, з вялікім жаданнем працаваць. З улікам таго што цяпер у гаспадарцы вырошчваюць не толькі буйную рагатую жывёлу, як было на пачатку яго працоўнай дзейнасці, але і птушку, свіней, работы ў галоўнага вет­урача дый ва ўсіх спецыялістаў службы, па словах Сяргея Мянькоўскага, дастаткова. Здараюцца і цяжкасці, без якіх мала дзе абыходзіцца. Аднак, нягледзячы на гэта, праблемныя пытанні заўсёды знаходзяць сваё вырашэнне.

На запытанне, якіямі якасцямі, акрамя прафесіяналізму — гэта бясспрэчна — неабходна валодаць, каб быць сапраўдным спецыялістам сваёй справы, мой суразмоўца з усмешкай і ўсур’ёз заўважае: “Мець самавалоданне. А яшчэ — хутка прымаць “халодныя” рашэнні і быць патрабавальным, у першую чаргу да сябе”.

Алена КАРПЕНКА. Фота Юрыя ЮРКЕВІЧА.