Тысячнікаў у раёне прыбавілася
Удзячнасці ад раённага выканаўчага камітэта і райкама прафсаюза работнікаў АПК, ад апошняга таксама — вымпелы і адметныя знакі на камбайны “Тысяча тон” за добрасумленную працу ўручыў учора, 5 верасня, старшыня райкама прафсаюза работнікаў АПК Сяргей Феднеў членам трох экіпажаў зернеўборачных камбайнаў філіяла “Варатынь” ААТ “БЗТДіА”.
Намалоты збажыны, з улікам убранага ў Клімавіцкім раёне, дзе нашыя земляробы на працягу двух тыдняў аказвалі дапамогу ва ўборцы ўраджаю, пераўзышлі 1 000 тон. Гэта старшыя камбайнеры і камбайнеры Дзяніс Уладзіміравіч Бутылін і Валерый Леанідавіч Аўрамчык, Леанід Акімавіч Маліноўскі і Андрэй Аляксандравіч Парахневіч, Аляксандр Віктаравіч Чарноў і Вадзім Уладзіміравіч Вараб’ёў. Такіх жа ўзнагарод за намалочаную ўжо дома тысячу ўдастоіўся і экіпаж філіяла ў складзе старшага камбайнера Дзмітрыя Аляксандравіча Талкачова і камбайнера Андрэя Віктаравіча Аляксашына.
Хто ж яны — новыя тысячнікі?
Да прыкладу, Вадзім Вараб’ёў (фота ўверсе) у памочніках камбайнера пяты сезон. Сёлета дапамагаў у рабоце старшаму камбайнеру Аляксанд- ру Чарнову. Ва ўласнай гаспадарцы хлебаробы намалацілі больш за 900 тон зерня, яшчэ 100 тон дабралі ў суседзяў. Машыну, на якой працавалі, прыехаўшы, вычысцілі і памылі. Цяпер іх “Палессе” з удзячнасцю дэманструе сваю чырвань на сонцы — гатовы да зімовага захавання.
Дзмітрый Талкачоў — старшы камбайнер. Вопыт работы на зернеўборачнай машыне атрымаў, як прызнаецца, працуючы каля бацькі-механізатара: спачатку ў памочніках, пасля і за штурвалам камбайна. Пасля таго як тэхніку, на якой працавалі, спісалі, ад уборачных работ адыйшоў. У гэтым жа сезоне ізноўку ўзначаліў экіпаж. Уражанні, па словах Дзмітрыя, цудоўныя — як быццам бы і не было перапынку.
Алена КАРПЕНКА.
Фота аўтара.
