Прайшла рабочая нарада па жывёлагадоўлі
На базе Кавалёўскага СДК прайшла рабочая нарада па жывёлагадоўлі. Мерапрыемства адбылося ў панядзелак. Яго ўдзельнікамі сталі спецыялісты ўпраўлення сельскай гаспадаркі і харчавання райвыканкама на чале з намеснікам начальніка Аляксандрам Кісялёвым, кіраўнікі і галоўныя спецыялісты раённых гаспадарак.
Прычым, дэлегацыі ААТ “Неўскі-Агра” і СВК “Гігант”, дзе справы ў малочнай галіне, як адзначыў старшыня райвыканкама Павел Найдзён, патрабуюць неадкладнага рэагавання, былі ў пашыраным складзе, з удзелам загадчыкаў ферм.
Акцэнтуючы ўвагу на галоўнай задачы, якая стаіць перад работнікамі жывёлагадоўчай галіны — нарошчванні аб’ёмаў вытворчасці прадукцыі, робячы аналіз стану спраў у сельгасарганізацыях, дзе гэтай задачы не дасягаюць, кіраўнік раёна спыніўся на неабходнасці больш жорсткага падыходу ў вырашэнні пытанняў працоўнай, а разам з тым і тэхналагічнай дысцыпліны. “Спачатку даіць карову і толькі пасля яе карміць — менавіта такія факты выяўлены на аб’ектах ААТ “Неўскі-Агра” — супрацьнатуральна і недапушчальна, — канстатаваў Павел Найдзён. — Жывёла патрабуе да сябе гэткай жа ўвагі, як і чалавек”. Адзначыўшы вядучую ролю кіраўніка прадпрыемства ў наладжванні вытворчага працэсу, ён заклікаў не заніжаць таксама і адказнасць за вынікі працы спецыялістаў галіны і загадчыкаў МТФ, чые неабыякавасць, добрасумленнасць і ініцыятыўнасць у выкананні прафесійных абавязкаў павінны быць прыкладам для іншых работнікаў ферм.
Асаблівая ўвага падчас нарады была ўдзелена пытанням падрыхтоўкі жывёлаводчых аб’ектаў да зімне-стойлавага перыяду. Нягледзячы на тое, што многія гурты, як было адзначана, пакуль на выпасе, работы па ўцяпленні памяшканняў, іх пабелцы, рамонце сістэм вадапаення і выдалення арганікі ў бліжэйшы час павінны быць завершаны. Нагадана не забывацца на нарыхтоўку травянога корму, асабліва сельгаспрадпрыемствам, дзе яго аб’ёмы на ўмоўную галаву жывёлы не перавышаюць 15 ц к. адз.
Рэкамендавана памятаць, што выручаныя за прадукцыю жывёлагадоўлі грошы для большасці гаспадарак падчас зімы — асноўны, а то і адзіны сродак для функцыянавання. І якой быць сёлетняй зіме, залежыць ад саміх калектываў.
Алена КАРПЕНКА. Фота Юрыя ЮРКЕВІЧА.