У мінулую пятніцу прайшло пасяджэнне Бабруйскага раённага выканаўчага камітэта. Пачалося яно з актуальнай на гэтую пару тэмы папярэджання ўзнікнення і распаўсюджання на тэрыторыі раёна афрыканскай чумы свіней (АЧС). Тэмы не новай, але, як адзначыў старшыня райвыканкама Павел Найдзён, гэтым часам надзвычай важнай: падчас грыбнога сезону вяскоўцы масава наведваюць лясы, што павышае ступень рызыкі заносу небяспечнай хваробы на ўласныя падворкі.

У рэжыме асаблівай насцярогі, як было адзначана, павінны працаваць сельгаспрадпрыемствы, дзе займаюцца вырошчваннем свіней, у прыватнасці, СВК “Гігант”, філіялы “Варатынь” і “Агракамбінат КХП”. Традыцыйна задачы па забеспячэнні прафілактыкі АЧС — правядзенні тлумачальнай работы з насельніцт­вам — на старшынях сельсаветаў, раённых СМІ. “Мы працуем не дзеля галачкі, а дзеля выніку”, — канстатаваў кіраўнік раёна.

Шмат увагі было ўдзелена тэме гатоўнасці суб’ектаў гаспадарання раёна да работы ў асенне-зімовы перыяд — з дак­ладам па ім выступіла начальнік аддзела жыллёва-камунальнай гаспадаркі райвыканкама Ірына Пракопчык. Той факт, што выключна ўсе цеплакрыніцы і цеплакарыс­тальнікі на 1 верасня атрымалі пашпарты гатоўнасці, не павінен, па словах Паўла Найдзёна, адцягнуць увагу ад вырашэння іншых, не меней значных, пунктаў раённай праг­рамы. У прыватнасці, зніжэння выдаткаў за камунальныя паслугі, якія аказвае УКП “Жылкамгас”, разліку арганізацыі за паліўна-энергетычныя рэсурсы, замены цеп­лавых сетак, у кацельнай аг. Хімы — катла на болей энергаэфектыўны, аптымізацыі схем цеплазабеспячэння ў пас. Туголіца. Прысутны на пасяджэнні начальнік упраўлення па наглядзе за рацыянальным выкарыстаннем паліўна-энергетычных рэсурсаў Магілёўскага аблвыканкама А.К. Баграцін парэкамендаваў жылкамгасу прыняць усе неабходныя меры па рэалізацыі мерапрыемстваў па энергаэфектыўнасці.

Пытанне супрацьпажарнай бяспекі жыллёвага фонду і суб’ектаў гаспадарання раёна, з дакладам па якім выступіў першы намеснік начальніка Бабруйскага гаррайаддзела па надзвычайных сітуацыях П.І. Шарснёў, было абмеркавана ў кантэксце папярэдняга — пад­рыхтоўкі да зімы, стала яго лагічным працягам. І незнарок: з 29 пажараў, што здарыліся ў раёне з пачатку года (3 чалавекі загінула), амаль палова прыйшлася на студзень-люты. Відавочна, што ў падрыхтоўцы да ацяпляльнага сезону работа па папярэджанні пажараў зацікаўленымі службамі павінна быць актывізавана і право­дзіцца, па словах старшыні райвыканкама, сумесна з супрацоўнікамі гаррайаддзела па НС. “Наша сумесная з МНС задача — знізіць колькасць пажараў і захаваць жыцці лю­дзей”, — адзначыў кіраўнік раёна, звярнуўшы ўвагу на неабходнасць абследаваць да зімы ўсе без выключэння сельскія населеныя пункты. Болей адказна да вырашэння пытанняў супрацьпажарнай бяспекі рэкамендавана аднесціся і кіраўнікам суб’ектаў гаспадарання — забяспечыць кант­роль за ліквідацыяй выяўленых гаррайаддзелам парушэнняў, актывізаваць прафілактычную работу ў калектывах, накіраваную на павышэнне адказнасці работнікаў за ўласнае жыццё.

Алена КАРПЕНКА.