Гаспадаркі Бабруйскага раёна ўключаюцца ва ўборку рапсу
Адна за другой раённыя гаспадаркі ўключаюцца ва ўборку азімага рапсу. На сёння зборам масланасення займаюцца ў ААТ “Саўгас “Кісялевічы”, філіялах “Харчавік-Агра” ААТ “Чырвоны харчавік” і “Агракамбінат КХП” ААТ “Бабруйскі камбінат хлебапрадуктаў”. Убрана, па апошніх дадзеных, каля 70 з 2233 га, намалочана больш за 120 тон масланасення. Рабіць разлік ураджайнасці, па словах намесніка начальніка ўпраўлення сельскай гаспадаркі і харчавання райвыканкама Ж.А. Жукоўскай, яшчэ рана: асноўныя пасевы даспяваюць, пакуль вядзецца іх абкоска і ўбіраюцца падгарэлыя ўчасткі.
Таксама ў раёне працягваецца ўборка насеннікаў мнагалетніх злакавых траў. З кліна ў 584 га ўбрана трэць. Намалот склаў 90 тон. Ураджайнасць траў, як адзначаюць у райсельгасхарчы, найлепшая за апошнія гады.
І, вядома ж, не зніжае тэмпаў корманарыхтоўка: занатоўка сена і закладка сянажнай масы ў траншэі. Дзеля гэтага ў сельгаспрадпрыемствах прыступілі да касьбы траў другога ўкосу. У цэлым па раёне на ўмоўную галаву жывёлы нарыхтавана 10 ц к. адз., або трэць ад патрэбы. У разрэзе гаспадарак паказчык вагаецца ад 7,5 да 16,2 ц к. адз. (у гаспадарках з большым пагалоўем — ніжэйшы). Самы высокі ў “Харчавіку-Агра”, нязначна адстае — 15,6 ц к. адз. — ААТ “Аграмашсервіс”.
Алена КАРПЕНКА.