Бабруйскі раён прызнаны пераможцам рэспубліканскага конкурсу “Лепшы раён Магілёўскай вобласці для бізнесу ў Беларусі-2017” у катэгорыі рэгіёнаў з колькасцю насельніцтва да 50 000 чалавек.

Дыплом пераможцы і сувенір на памяць прадстаўнікам Бабруйшчыны ў Мінску, у мастацкай галерэі “Універсітэт культуры”, уручыў старшыня прэзідыуму Вышэйшага каардынацыйнага савета Ула­дзімір Карагін.

Атрыманая ўзнагарода, па словах намесніка старшыні рай­выканкама Марыны Тарэлкінай (на фота), надзвычай прэстыжная — азначае тое, што Бабруйскі раён развіваецца і тут створаны камфортныя ўмовы для вя­дзення бізнесу. Яна адзначыла, што па стане на 1 студзеня сёлетняга года ў раёне налічвалася 373 камерцыйныя арганізацыі і 255 індывідуальных прадпрымальнікаў. Каля 25% суб’ектаў занята ў сферы транспарту, 17% — у вытворчасці, прыкладна 20% — у сферы гандлю. Штогод у раёне рэгіструецца прыкладна 20-25 новых арганізацый малога і сярэдняга бізнесу. У мінулым го­дзе — 25 суб’ектаў малога прадпрымальніцтва і 26 індывідуальных прадпрымальнікаў. За 1-е паўгоддзе сёлетняга года зарэгістравана 6 новых камерцыйных арганізацый. Удзельная вага работнікаў, якія заняты ў сферы малога бізнесу, складае амаль 30% ад агульнай колькасці занятых у эканоміцы. У асноўным гэтымі суб’ектамі ажыццяўляецца знешняя гандлё­вая дзейнасць. Да прыкладу, калі ў 2015 годзе на долю такога экспарту прыходзілася 55% ад аб’ёму ў цэлым, то ў 2016 ужо 97%. Калі ўзяць за аснову такі параметр, як паступленні ў бюджэт, то ў мінулым годзе доля даходаў суб’ектаў малога і сярэдняга бізнесу ў агульнай структуры даходаў раёна склала 40,1%.

Рэспубліканскі конкурс право­дзіцца штогод. Галоўная яго мэта — вызначыць рэгіёны Беларусі, у якіх створаны найбольш аптымальныя ўмовы для развіцця прадпрымальніцтва. Сёл­ета ўдзель­­нікамі конкурсу сталі 6 абласцей Беларусі, 8 сталічных раёнаў. На цырымоніі ўзнагароджвання прысутнічалі прадстаўнікі органаў дзяржаўнай улады, дыпламатычнага корпуса, прадпрымальніцкіх структур, грамадскага сектара.

Алена КАРПЕНКА.
Фота аўтара.