У “Міхалёўскай Ніве” сеялі кукурузу, у “Неўскім-Агра” садзілі бульбу
Палявыя работы ў раёне працягваюцца. У гаспадарках займаюцца сяўбой кукурузы, адналетняй травы, пасадкай бульбы (некаторыя з гэтымі работамі ўжо справіліся), выконваюць мерапрыемствы па доглядзе пасеваў, па закладцы пашы, па перазалужванні лугава-пашавых угоддзяў…
Да прыкладу, на палях за в. Плёсы ў гэтую сераду механізатары ААТ “Міхалёўская Ніва” працягвалі сеяць кукурузу. Адно поле на момант нашага прыезду было ўжо цалкам засеяна, да работ на другім толькі прыступілі. Тэхніка — трактар МТЗ-1221 з сеялкай СКП-12 — працавала зладжана, настрой у маладога земляроба Анатоля Кукабака быў цудоўны.
Яшчэ адна сеялка ў гэты дзень працавала на полі ля аг. Іванаўка, кіраваў ёй Міхаіл Ганчароў.
— Азмрачае толькі адно, — разважае ўжо прыкметна загарэлы ад першых сонечных прамянёў механізатар Анатоль, — адсутнасць веснавога дожджыку. Вільгаці перасушанай на гэтым участку глебе не памяшала б, дый пылу было б значна меней.
* * *
Механізатараў ААТ “Неўскі-Агра” мы засталі ў гэты дзень на полі побач з калгасным яблыневым садам. Тут вялася пасадка бульбы. Займаўся гэтай адказнай справай Аляксандр Алісеенка разам з напарнікам-памочнікам Васілём Сокалам.
Насенне на МАЗе падвозіў Вячаслаў Балыка.
— Матэрыялу насеннага ў дастатку, яшчэ і застанецца, — дзеліцца вадзіцель, — тым болей, што з пасадкай бульбы гаспадарка ўжо завяршае. Пасадзілі клубні ў тэрмін — будзем спадзявацца на добры ўраджай.
Алена КАРПЕНКА.
Фота Юрыя ЮРКЕВІЧА.
