Чэмпіянат па міні-футболе сярод раённых і гарадскіх каманд, прымеркаваны да 72-й гадавіны Перамогі ў Вялікай Айчыннай вайне, прайшоў у мінулую пятніцу на базе абласной дзіцяча-юнацкай школы алімпійскага рэзерву прафсаюзаў «Спартак-2006». Арганізатарамі мерапрыемства выступілі Бабруйскае раённае і Бабруйскае гарадское аб’яднанні прафсаюзаў пры садзеянні рэспубліканскага спартыўнага грамадскага аб’яднання “Тэрыторыя футболу”.

Удзел у турніры прынялі 6 каманд з ліку членаў прафсаюзных арганізацый, якія ўваходзяць у адно з двух аб’яднанняў прафсаюзаў, — ААТ «Бабруйскі камбінат хлебапрадуктаў», ДЛГУ «Баб­руйскі лясгас», ААТ «Чырвоны харчавік», ААТ «Кіруючая кампанія холдынгу «Бабруйскаграмаш», ААТ «Машынабудаўнік» і УП «Універсал Баб­руйск».

Адкрываючы мерапрыемства, старшыні раённага і гарадскога аб’яднанняў Людміла Крычко і Аляксандр Казусёнак натхнілі каманды на паспяховую гульню і выказалі спадзяванне, што імкненне маладых людзей да перамогі будзе не меней упартым за тое, з якім іх прадзеды абаранялі родную зямлю ад ворага.

Пачалася гульня пасля традыцыйнага лёсавання (рус. — жеребьевка). Асаб­лівага накалу яна дасягнула пасля таго, як было вызначана з паўфіналіс­тамі. У надзвычай напружанай барацьбе за 3-е месца паміж камандамі «Баб­руйскі КХП» і «Машынабудаўнік» перамогу атрымалі першыя. І ўжо зусім гарачай стала барацьба за 1-е месца, пасля таго як на поле выйшлі найбольш моцныя каманды «Чырвоны харчавік» і «Баб­руйскаграмаш». У выніку абсалютным лідарам прызнана каманда «Аграмаша», якая перамагла праціўніка (пенальці) з лікам 3:2.

Вядома ж, не абыйшлося без узнагароджванняў. Каманды-пераможцы (1-3-е месцы) атрымалі дыпломы і каштоўныя падарункі (спартыўны інвентар) ад арганізатараў. Прызоў удастоіліся таксама «Лепшы гулец турніра» Качаргін Аляксандр з каманды «Бабруйск­аграмаш» і «Лепшы брамнік» Печурэнка Леанід з «Чырвонага харчавіка». Не засталіся без увагі і астатнія ўдзельнікі турніру, якім былі ўручаны заахвочальныя прызы і дыпломы.

Спартыўнае свята — па-іншаму арганізаванае прафсаюзнымі аб’яднаннямі мерапрыемства не назавеш — прынесла станоўчыя ўражанні як для саміх удзельнікаў, так і для іх родных, сяброў і проста неабыякавых да гульні людзей, якія прыйшлі падтрымаць футбалістаў. Тым самым яшчэ раз даказаўшы, што прафсаюзы клапоцяцца пра чалавека. Прычым на аднолькава высокую ступеньку ставяць працу і якасны адпачынак. Зрэшты, як адзначыла Людміла Крычко, гэтае спартыўнае свята вырашана зрабіць традыцыйным на Бабруйшчыне.

Алены КАРПЕНКА. Фота аўтара.