Праца ў полі павінна быць бяспечнай
Гэта адна з галоўных умоў, якой павінны кіравацца ў сельгасарганізацыях падчас планавання веснавых палявых работ, — адзначае А.В. Сапега, вядучы інжынер-інспектар дзяржтэхнагляду, адказны за ахову працы ў сельгасарганізацыях раёна.
Улічваючы тое што работы са сродкамі аховы раслін: ядахімікатамі, пратрутай, а таксама мінеральнымі ўгнаеннямі маюць шкодныя вытворчыя фактары, яны патрабуюць штогоднай абавязковай санітарна-гігіенічнай экспертызы. У сувязі з гэтым гаспадаркамі кожны год праводзяцца медыцынскія агляды работнікаў, якія на іх заняты. Атрымаўшы допуск медкамісіі, работнікі, да таго ж, праходзяць санітарна-гігіенічнае навучанне ў Бабруйскім занальным цэнтры гігіены і эпідэміялогіі.
Да пачатку сёлетніх веснавых палявых работ, як адзначыў Аляксандр Сапега, людзі, якія працуюць з мінеральнымі ўгнаеннямі, ядахімікатамі, пратрутай, прайшлі медыцынскія камісіі і санітарна-гігіенічнае навучанне практычна ў поўным аб’ёме. Кіраўнікам сельгасарганізацый, дзе ў гэтым плане маюцца недапрацоўкі — не атрыманы заключэнні па экспертызе — выдадзены рэкамендацыі па іх выпраўленні з прызначэннем дакладных тэрмінаў для гэтага. У бліжэйшыя дні, па яго словах, практычна ўсе недахопы будуць выпраўлены.
Таксама, як было адзначана, завяршаюцца работы па падрыхтоўцы сталовых, прызначаных для прыгатавання гарачых абедаў працаўнікам палёў. Большасць гаспадарак атрымала, некаторыя — атрымліваюць, допускі санітарнага стану на іх работу: магчымасць гатаваць абеды, фасаваць і раздаваць іх. Адпаведную санітарна-гігіенічную экспертызу праходзяць прызначаныя для развозу абедаў машыны. Медыцынскі допуск атрымліваюць людзі — вадзіцелі і тыя, хто будзе развозіць і раздаваць ежу. На гэтым тыдні, як паведамілі ў райсельгасхарчы, пытанні, звязаныя з работай сталовых, будуць зняты.
Што датычыцца непасрэдна аховы працы падчас масавых палявых работ, то ў раёне гэтым часам, з 27 сакавіка па 28 красавіка, праходзіць месячнік бяспечных умоў працы і прафілактыкі вытворчага траўматызму ў сельгасарганізацыях. У яго межах райсельгасхарчам распрацаваны і праводзяцца мерапрыемствы, выкананне якіх для гаспадарак безагаворачнае, бо галоўная іх мэта — папярэдзіць няшчасныя выпадкі падчас палявых работ. Ва ўсіх сельгасарганізацыях былі праведзены інструктажы з работнікамі палёў, апошнім выдадзены сродкі індывідуальнай аховы — праводзіцца ўсебаковая работа па недапушчэнні выпадкаў траўматызму. У якасці кантролю за выкананнем патрабаванняў аховы працы сельгасарганізацыі наведваюць члены створанай у райвыканкаме мабільнай групы па аказанні метадычнай і практычнай дапамогі — падчас месячніку яе работа ўзмоцнена. Па выніках выяўленых парушэнняў гаспадаркам накіроўваюцца рэкамендацыі па іх выкараненні. Калі апошнія не выконваюцца, пытанне выносіцца на пасяджэнне раённай камісіі па ахове працы, якая праходзіць з удзелам прадстаўнікоў інспекцыі дэпартамента працы, і ў гаспадарцы, якая ігнаруе патрабаванні, праводзіцца, у адпаведнасці з заканадаўствам, пазапланавая праверка.
Алена КАРПЕНКА.