Канікулы завяршаюцца
Веснавыя канікулы школьнікаў падышлі да заканчэння. Прайшлі яны імкліва не толькі таму, што на перапынак ад вучэбнага працэсу ў гэты час традыцыйна адводзіўся тыдзень, але і з-за насычанасці іх цікавымі і захапляльнымі мерапрыемствамі.
У мэтах аздараўлення вучняў у раёне было створана 9 лагераў дзённага знаходжання. Яны працавалі на базе Брожскай, Варатынскай, Гарбацэвіцкай, Каменскай сярэдніх школ, а таксама Міхалёўскага, Осаўскага, Хімоўскага, Глушанскага і Ленінскага вучэбна-педагагічных комплексаў. Аздараўленне прайшлі 152 школьнікі. Праграмы лагераў, як заўсёды, былі рознапланавымі.
25 сакавіка ў раёне стартавала міжведамасная прафілактычная акцыя “Бяспечныя канікулы на карысць”, якая завяршыцца 1 красавіка. Мерапрыемствы накіраваны на фарміраванне ў хлопчыкаў і дзяўчынак культуры паводзін, здаровага ладу жыцця, бяспечнай жыццядзейнасці. Кожны дзень насіў тэматычны характар: дзень сямейнага адпачынку, дзень бяспекі, дзень здароўя і спорту, дзень прафілактыкі супрацьпраўных паводзін, дзень культуры, пазітыву, жарту і інш. У межах акцыі прайшоў злёт юных інспектараў руху, спартыўныя мерапрыемствы “Мы за здаровы лад жыцця!”, “Мама, тата і я — спартыўная сям’я”, віктарыны па тэме здаровага ладу жыцця, конкурсы малюнкаў, хвіліны здароўя. Былі арганізаваны сустрэчы з супрацоўнікамі ДАІ, гаррайаддзела па надзвычайных сітуацыях, інспекцыі па справах непаўналетніх.
У межах Дня пазітыву і інтэлектуальнага развіцця на базе Бортнікаўскага ВПК прайшла раённая канферэнцыя работ даследчага характару навучэнцаў 1-4 класаў. У перыяд з 28 па 30 сакавіка прайшлі алімпіяды па агульнаадукацыйных прадметах сярод малодшых школьнікаў. Плануючы работу на канікулах, у школах, як адзначыла начальнік аддзела адукацыі, спорту і турызму райвыканкама Алена Баркоўская, імкнуліся па-максімуме ахапіць аздараўленнем дзяцей з сем’яў, што знаходзяцца ў сацыяльна-небяспечным становішчы, і дзяцей, якія значацца на ўліку ў ІСН, на унутрышкольным кантролі.
Было чым заняцца ў сценах школ падчас канікулаў і старшакласнікам. Яны наведвалі гурткі па інтарэсах, факультатыўныя заняткі па прадметах, рыхтаваліся да выпускных іспытаў, цэнтралізаванага тэсціравання, а таксама да раённага конкурсу “Вучань года”, правядзенне якога запланавана на 7 красавіка.
Алена КАРПЕНКА.