Выйшлі ў поле трактары
У раёне працягваецца вывазка на палі і ўнясенне ў глебу арганікі пад ярыну. Актыўна вядзецца падкормка мнагалетняй травы, распачата падкормка азімых зерневых i азімага рапсу.
У Бабруйскім ААТ “Аграмашсервіс” і філіяле “Агракамбінат КХП” ААТ “Бабруйскі камбінат хлебапрадуктаў” пасеяна 121 га аўсу. Таксама ў раёне пачалі сеяць адналетнюю траву, займаюцца падсейваннем мнагалетнікаў. Апошняе выканана на плошчы 1053 га — прыкладна чвэрць ад неабходнага. Працягваецца закладка насеннікаў мнагалетняй травы. Вядуцца ворыўныя работы. Па апошніх дадзеных у цэлым па раёне заарана 2 220 га, што складае 12% ад плану. У некаторых гаспадарках прыступілі да закрыцця вільгаці, праводзяць культывацыю пасеваў. У цэлым пад сяўбу ярыны падрыхтавана 485 га (5% ад патрэбы), 121 — засеяна.
Што датычыцца структуры пасяўных плошчаў, то пад яравыя зерневыя і зернебабовыя культуры сёлета запланавана заняць 9 300 га. З іх амаль 500 га — пад пшаніцу, 3 100 га — пад ячмень. Запланавана пасеяць 150 га соі, прыкладна 1 700 га аўсу, 320 га проса на зерне, 880 — кукурузы на гэтыя мэты. Зернебабовымі: гарохам, лубінам, пялюшкай, кармавымі бабамі, іншымі культурамі, запланавана заняць у агульным 2668 га. У ААТ “Неўскі-Агра” і “Міхалёўская Ніва” традыцыйна будуць займацца вырошчваннем цукровых буракоў. Таксама ў раёне запланавана пасеяць маслічную рэдзьку, пры неабходнасці — яравы рапс. Пад бульбу адведзена 1 015 га. 6 350 га плошчаў, у адпаведнасці з планам, будзе занята пад кукурузу на сілас. Яшчэ 2 800 га адведзена пад адналетнікі, якія збіраюцца выкарыстаць як для зялёнай падкормкі жывёле, так і для прыгатавання “зімовага” корму. Што да гародніны, то ёю па традыцыі займуцца аграрыі “ВЕОМа”, а таксама ААТ “Саўгас “Кісялевічы” і “Міхалёўская Ніва”.
Алена КАРПЕНКА.
Фота з архіва рэдакцыі.