Застаць на працоўным месцы Лідзію Мікалаеўну Маруга, аператара машыннага даення МТФ Емяльянаў Мост філіяла “Агракамбінат КХП” ААТ “Баб­руйскі камбінат хлебапрадуктаў”, цяжкасцяў не склала.

Пакуль каровы не на выпасе, дойка на ферме трохразовая, а гэта, па словах субяседніцы, лічы, увесь дзень на тэрыторыі гаспадаркі. Тым болей што патрабаванні да вытворчага працэсу цяпер не ўровень з тымі, што былі раней. Каб ісці ў ногу з часам, іх даводзіцца строга прытрымлівацца, што не скарачае працоўны дзень, але дае магчымасць атрымліваць прадукцыю найвышэйшага гатунку і павялічваць заробкі.

…Так распарадзіўся лёс, што замест кулінара — гэтую прафесію Лідзія Маруга набыла пасля заканчэння Бабруйскага гандлёва-кулінарнага вучылішча — жанчына стала аператарам машыннага даення. Хлопец, за якога выйшла замуж, быў родам з Брожкі, што суседнічае з Емяльянавым Мастом. На ягоную малую радзіму і прыехала жыць маладая сям’я. Зразумела, хацелася свайго жылля. Гэтую праблему ўзялася вырашыць мясцовая гаспадарка пры ўмове, што маладая жанчына прыйдзе працаваць даяркай. І Лідзія Мікалаеўна пагадзілася. З той пары вось ужо сямнаццаты год яна — аператар машыннага даення. Прафесія, без сумнення, цяжкая. На ферме з малакаправодам нямала ручной працы, але чалавек, гаворыць, прызвычайваецца да ўсяго. Болей таго, у сваёй рабоце мая суразмоўца бачыць і станоўчае — жывёла робіць людзей спагадлівымі, здымае стрэс. Праца ў дружным, працавітым, нацэленым на дасягненне высокіх паказчыкаў калектыве — а ён на МТФ Емяльянаў Мост менавіта такі — прыносіць задавальненне, дае адчуванне сваёй значнасці для грамадства.

Што датычыцца сям’і Лідзіі Мікалаеўны, то для ўсіх і кожнага ў яе знойдзецца не толькі ласкавае слова, але і матэрыяльная падтрымка. Апошняе дзякуючы ў тым ліку і немалой хатняй гаспадарцы, для якой даярка, нягледзячы на напружаны працоўны графік, таксама вылучае час. У яе гасцінны дом з задавальненнем наведваюцца не толькі дзеці — старэйшы сын жыве з сям’ёй у Каменцы, працуе ў ААТ “Стасеўка”, малодшы на заробках у Расійскай Федэрацыі — але і дзве ўнучкі. А гэта хіба не найбольшае шчасце для жанчыны-маці?

Працоўныя дасягненні вопытнай даяркі не засталіся па-за ўвагай — за шматгадовую добрасумленную працу, высокі ўзровень прафесіяналізму, значны асабісты ўклад у развіццё сельскагаспадарчай галіны Лідзія Маруга па выніках работы за мінулы год узнагароджана Ганаровай граматай камітэта па сельскай гаспадарцы і харчаванні Магілёўскага аблвыканкама.

Алена КАРПЕНКА. Фота Юрыя ЮРКЕВІЧА.