У раёне працягваюць рыхтавацца да веснавых палявых работ. Што датычыцца насення, то яго на гэтую пару маецца 105% ад патрэбы. 99% з агульнай колькасці ўжо прызнана годным, астатняе — на стадыі праверкі: вядзецца назіранне за яго прарошчваннем.

Усё без выключэння насенне ярыны ачышчана. Праўда, ёсць некаторая праблема з зернебабовай групай, аднак гаспадаркі ўжо дамовіліся з элітгасамі на набыццё гароху, пялюшкі. Таму ў бліжэйшы час, як адзначыла намеснік начальніка райсельгасхарчу па раслінаводстве Арына Сяргеева, пытанне мае быць вырашана. Заключаны дамовы, гаспадаркі робяць праплаты і за насенне мнагалетнікаў, якога ў раёне пакуль толькі 60% ад патрэбы.

Працягваецца вывазка на палі арганікі. Вывезена 170 тыс. тон, гэта 55% ад задання і 87% — да распрацаванага ў раёне графіку вывазкі. З мінеральных угнаенняў гаспадаркі гэтым часам набываюць азотныя: завозяць з базы хімізацыі Бабруйскага ААТ “Аграмашсервіс” на свае тэрыторыі. Пад зябліва з восені ўнесены калійныя ўгнаенні на плошчы 1 234 га.

А ўвогуле да 1 сакавіка ў гаспадарках распрацавалі планы веснавых палявых работ, і цяпер галоўнае — іх выконваць.

Алена КАРПЕНКА.