Працаўніца-пераможца і абаяльная жанчына
Вольгу Шкрадзюк з філіяла “Харчавік-Агра” ААТ “Чырвоны харчавік” у раёне ведаюць як выдатную работніцу. Яна — пераможца раённага спаборніцтва па выніках работы за мінулы год у намінацыі “Лепшая маладая даярка”. Такое прызнанне, згадзіцеся, каштуе многага, асабліва, калі ты спаўна выкладваешся і любіш справу, якой займаешся. Усё гэта — пра Вольгу.
Да сваіх рагуль на МТФ “Савічы” — а іх у аператара машыннага даення больш за 60 — маладая жанчына спяшаецца ў 5.00 раніцы! А адпачыць ўдаецца далёка не заўсёды. Як і кожнай матулі, ёй хочацца большай увагай агарнуць сваіх дзетак — у сям’і выхоўваюцца двое сыноў 11 і 10 год, смачнай вячэрай парадаваць мужа-механізатара.
Вясковае жыццё, з якім звыклася з дзяцінства, Вользе да спадобы — маладая сям’я жыве ў яе роднай Іванаўцы, у вылучаным гаспадаркай доме — сельскагаспадарчай працы ніколі не цуралася. Дый хіба магло быць па-іншаму, калі вырасла лепшая маладая даярка ў сям’і жывёлаводаў?! Маці-даярка і бацька-слесар гэтай жа малочна-таварнай фермы не па кніжках вучылі дзяцей, адкуль бяруцца на стале хлеб і малако.
Як і кожная жанчына, Вольга Шкрадзюк з трапятаннем чакае дня 8 Сакавіка. Яе мужчыны, упэўнена, абавязкова падрыхтуюць да гэтай даты падаруначкі. Па традыцыі і сама яна не абміне ўвагай родных і сяброў. Усе разам яны абавязкова збяруцца за святочным сталом, каб пажадаць адзін аднаму здароўя, поспехаў, парадавацца шчымліва-прыемнаму подыху вясны.
Алена КАРПЕНКА.
Фота Юрыя ЮРКЕВІЧА.