Міхаіл Стрыжэўскі: «Поспех прыходзіць да тых, хто да яго імкнецца»
Надзвычай ураджайным на перамогі па выніках раённага спаборніцтва стаў мінулы год для калектыву філіяла “Харчавік-Агра” ААТ “Чырвоны харчавік”. На рахунку гаспадаркі тры першых месцы (“За эфектыўнае выкарыстанне сельскагаспадарчых угоддзяў”, “За павелічэнне вытворчасці нарыхтовак малака” “За павелічэнне вытворчасці мяса”), а таксама 3-е месца ў намінацыі “За вытворчасць зерня”. Гэтая прыемная нагода і стала прычынай для перадсвяточнага інтэрв’ю з дырэктарам філіяла Міхаілам Стрыжэўскім.
— Міхаіл Мікалаевіч, за кошт чаго гаспадарка, якую вы ўзначалілі, выйшла ў перадавыя?
— Прычын некалькі, і першая з іх, што мне пашанцавала з камандай спецыялістаў, людзьмі высокапрафесійнымі і надзвычай адказнымі.
— Каманда была ці вы стварылі?
— Каманда была, яна і засталася, нікога новага (усміхаецца) я з сабою не прывёў. Яшчэ адна прычына — калектыў у цэлым: механізатары, вадзіцелі, жывёлаводы, даяркі, іншыя занятыя ў галіне. Усе разумеюць, што працаваць трэба на сумленне, інакш не будзе выніку, а значыць і грошай. Прыйшлося, вядома ж, з людзьмі размаўляць, тлумачыць сутнасць сваёй пазіцыі. Правялі ў гэтых мэтах не адзін сход, прафесійныя вучобы, даводзілі важнасць выканання тэхналагічных патрабаванняў. Стварыць сапраўдны калектыў — работа нялёгкая, і ў нас гэта атрымалася. Цяпер кожны разумее, што ад яго непасрэднага ўнёску ў агульную справу напрамую залежыць ўласны дабрабыт. Заробак сярэднемесячны ў нас нядрэнны, таму кожны шануе сваё працоўнае месца. Паднялі таксама вытворчую дысцыпліну, тэхналагічную. Усё гэта, адно да аднаго, і склалася ў поспех.
— Калі гаварыць пра малако, то ці толькі дысцыпліна і выкананне тэхналогій прывялі да нарошчвання яго аб’ёмаў?
— Не толькі. У жывёлагадоўлі шмат залежыць ад корму. 2015 год быў у гэтым плане, калі памятаеце, надзвычай складаным. Прыкладна такім жа выдаўся і 2016: зноў засуха, недахоп вільгаці для росту раслін, непаўнавартасны летні корм. Усё гэта адбілася на нашых паказчыках — да ўзроўню 2015 года малака атрымалі некалькі меней. Тым не менш, зрабілі ўсё магчымае, у тым ліку правялі на сваіх пасяўных плошчах эксперыменты, якія ўдаліся, — і стварылі трывалую кармавую базу на зімоўку 2016-2017 гадоў: 46,7 ц к.адз. на ўмоўную галаву. Акрамя таго, з дапамогай галаўнога прадпрыемства набылі да зімоўкі сучасны кормараздатчык — у рацыёне рагуль з’явілася якасна прыгатаваная кормасумясь. І сёння філіял прадае 8300-8500 кг малака штодзённа, удвая болей, чым некалькі год таму. Вядома ж, для нас гэта не мяжа, будзем удасканальваць вытворчасць і імкнуцца павялічыць паказчыкі. У гэтай сувязі хачу выказаць словы падзякі саветніку старшыні аблвыканкама Барысу Клешчукевічу, які неаднойчы наведваўся ў гаспадарку, дзяліўся вопытам, вучыў тэхналагічным правілам. Міхаілу Левакову — за слушныя парады, дзякуючы якім мы змаглі нарыхтаваць высокаякасны корм. Дырэктару галаўнога прадпрыемства Сяргею Анюхоўскаму — за паразуменне і гатоўнасць падтрымаць новую ідэю. Увогуле, заўсёды гавару калектыву і настройваю людзей на тое, што трэба вучыцца, удасканальваць веды па прафесіі. Стоячы на месцы, росту не дасягнеш. Тым болей цяпер, калі эканамічная сітуацыя патрабуе зніжэння затрат на вытворчасць.
— Што скажаце пра мясную галіну?
— Тут адзначу, што мы, напэўна, першыя ў раёне прымянілі новую тэхналогію вырошчвання маладняку — на базе філіялу неаднойчы праводзіліся вучобы па гэтай тэме. У выніку захаванасць цялятак у нас практычна стопрацэнтная. Тут, вядома ж, вялікі дзякуй нашым ветурачам і тым, хто займаецца з жывёлай непасрэдна на фермах. Вынік іх работы відавочны — сёння гадавалых быкоў прадаем на мясакамбінат вагой 400 кг і болей.
Словам, наш калектыў настроены на працу, мы з аптымізмам глядзім у будучыню, бо поспех прыходзіць да тых, хто да яго імкнецца.
Алена КАРПЕНКА.
Фота з архіву рэдакцыі.