Аграрыі “Харчавіка-Агра” — за раскідваннем арганікі
Па-сапраўднаму веснавы настрой панаваў у панядзелак на полі філіяла “Харчавік-Агра” ААТ “Чырвоны харчавік”, якое раскінулася адразу за вёскай Пралетарская — механізатары называюць яго Белым Балотам.
Ствараў настрой не толькі шчодры на сонечныя прамяні дзень, аголеная, набраклая, гатовая да прыняцця насення зямля, але надзвычай зычны пасля працяглага зімовага зацішша гул трактароў. Апошнія, здавалася, ігралі ў толькі ім вядомую гульню: шпарка да аднаго месца з’язджаліся і тут жа раз’язджаліся. Але гэта толькі здалёк. Зблізку правілы сталі зразумелыя — прыемна было назіраць за размеранай работай механізаванага атрада, які актыўна займаўся раскідваннем арганічных угнаенняў. Кожны на сваім трактары, механізатары Аляксей Капусцін, Віктар Крычко, Віктар Шпак, Аляксандр Ступень, Павел Юшкевіч пачаргова пад’язджалі да пагрузчыка «Амкадор», якім кіраваў Васіль Давыдзенка, занатоўвалі ў прычэп арганіку, імкліва ад’язджалі на месца, дзе ўгнаенні яшчэ адсутнічалі, каб не пакінуць без здобы ніводнага лапіку поля.
Тут жа недалёка Мікалай Юшкевіч на трактары 3022 у звязцы з плугам ППА 8-40 займаўся ворыўнымі работамі. Усяго з пачатку сезону механізатар ужо заараў 240 гектараў.
Настрой ва ўсіх хлебапашцаў быў бадзёрым: і самі яны, і іх машыны, прызнаюцца, засумавалі за зіму па прасторы, дый грэе душу кожнаму спадзяванне на добры ўраджай.
Алена КАРПЕНКА.
Фота Юрыя ЮРКЕВІЧА.