Рамонтныя работы працягваюцца
Вясна, а разам з ёю і палявыя работы не за гарамі, таму, вядома, што падрыхтоўцы сельгастэхнікі да сяўбы ў гаспадарках надаюць асаблівую ўвагу.
На гэты час гатоўнасць энерганасычаных трактараў, як паведаміў начальнік вытворчага аддзела ўпраўлення сельскай гаспадаркі і харчавання райвыканкама Яўген Бярозкін, складае 79%. Гэта не так добра, як хацелася б, заўважае ён, і ўсё ж. Працягваецца рамонт вузлоў і агрэгатаў, здадзеных на спецыялізаваныя прадпрыемствы. Там знаходзяцца рухавікі і каробкі пераключэння перадач, а таксама камплектныя трактары — у агульным 9 адзінак тэхнікі. З фінансаваннем іх рамонту часткова дапамогуць (надбаўкамі за малако) абласныя службы, і 50% будзе выкарыстана раённых сродкаў.
У сувязі з тым, што крыніцы фінансавання вызначаны, ёсць усе падставы меркаваць, што да пачатку палявых работ рамонт энерганасычаных трактароў будзе завершаны.
Што датычыцца пасяўной тэхнікі, такой як камбінаваныя пасяўныя агрэгаты, то, па словах Яўгена Бярозкіна, іх гатоўнасць пакуль складае 52% . Аднак, зноў жа, улічваючы тое, што асабліва складаных рамонтаў тут няма і гаспадаркі вызначаюцца з фінансаваннем, можна гаварыць, што на 1 сакавіка дадзеная тэхніка ў асноўным будзе стаяць на лінейцы гатоўнасці. Плугі ў раёне падрыхтаваны на 70% — затрымак з іх рамонтам быць не павінна. камбінаваныя глебаапрацоўчыя агрэгаты тыпу АКШ — на 69%, дыскатары — на 63%. Гатоўнасць для дадзенага перыяду нядрэнная, аднак паслабленне і прамаруджванне з рамонтам недазваляльныя.
Запісала Алена КАРПЕНКА.