Папярэджаны — значыць, абаронены
Як паведамілі ў Бабруйскім занальным цэнтры гігіены і эпідэміялогіі, гэтым часам на тэрыторыі раёна ідзе стадыя нарошчвання вострых рэспіраторных вірусных інфекцый. Выпадкаў грыпу ў раёне не зарэгістравана.
Аднак у сувязі з тым, што ўмовы надвор’я непрадказальна мяняюцца, насцярожанасць у дачыненні такога роду хвароб губляць не варта. А ў перыяд сязоннага пад’ёму захворвання на ВРВІ неабходна выконваць «рэспіраторны этыкет» — закрываць рот і нос падчас кашлю і чхання насоўкай ці індывідуальнай салфеткай, часцей мыць рукі з мылам, пазбягаць натоўпу, болей часу бавіць на свежым паветры, даваць яму доступ у памяшканні, не перахалоджвацца, пазбягаць стрэсаў, якія негатыўна ўздзейнічаюць на нервовую сістэму.
Варта памятаць, што медыкаментознае лячэнне прызначае толькі ўрач! У любым выпадку падчас грыпу трэба з асцярогай выкарыстоўваць гарачкапаніжальныя сродкі, бо пры высокай тэмпературы вірус гіне, змяншаючы тым самым працягласць хваробы і пагрозу ўскладненняў. Нельга спяшацца з антыбіётыкамі, якія падчас вірусных інфекцый неэфектыўныя. Затое трэба выконваць пасцельны рэжым, піць паболей вадкасці, пажадана з вітамінам С: цёплыя і кіслыя морсы, сокі, ваду з лімонам, настойку шыпшынніку, чорнай парэчкі, паласкаць горла і прамываць нос цёплай вадой з соллю (палова чайнай лыжкі на шклянку). Рэкамендуецца таксама падчас хваробы як мага меней датыкацца рукамі да твару і як мага часцей мыць іх з мылам.
Запісала Алена КАРПЕНКА.