Абмеркаваны важныя пытанні

У пятніцу, 17 лютага, прайшло пасяджэнне Бабруйскага раённага выканаўчага камітэта. Удзел у яго рабоце, акрамя непасрэдна членаў выканкама, прынялі начальнікі аддзелаў установы, старшыні сельскіх саветаў дэпутатаў, кіраўнікі сельгаспрадпрыемстваў і раённых службаў.

Усяго на абмеркаванне выносілася 30 пытанняў, асноўныя сярод іх — аб выніках работы па энергазберажэнні ў раёне ў 2016 годзе і задачах на сёлетні, аб стане злачыннасці на тэрыторыі раёна і мерах па яе зніжэнні, аб рабоце са зваротамі грамадзян і юрыдычных асоб за мінулы год.

Робячы даклад па першым пытанні, начальнік аддзела жыллёва­-камунальнай гаспадаркі райвыканкама Ірына Пракопчык адзначыла, што ў цэлым па раёне мэтавы паказчык па энергазберажэнні за 2016 год выкананы (- 8,3 % пры заданні -5,4). Не выканалі яго дзве гаспадаркі — філіял “Варатынь”ААТ “БЗТДіА” і Бабруйскае ААТ “Аграмашсервіс”. Заакцэнтаваўшы ўвагу на мерапрыемствах, што прывялі да эканоміі паліўна-энергетычных рэсурсаў, начальнік аддзела ЖКГ падрабязна спынілася на тых, якія неабходна ўкараніць, каб па выніках бягучага года зноўку мець эканомію. Старшыня райвыканкама Павел Найдзён пры гэтым заўважыў, што, укладваючы кожны бюджэтны рубель, неабходна пралічваць эканамічную выгаду ад гэтага і мець дасканалае ўяўленне аб важкасці для насельніцтва таго ці іншага мерапрыемства.

Шмат увагі было ўдзелена абмеркаванню мер па зніжэнні злачыннасці на тэрыторыі раёна. Пра тое, што за мінулы год, у параўнанні да папярэдняга, іх колькасць павялічылася, сярод непаўналетніх — у разы, далажыў начальнік РАУС Міхаіл Ермаловіч. Ён жа выказаў меркаванне, што асноўная прычына гэтага — у незанятасці насельніцтва (пераважная частка злачынцаў — беспрацоўныя), а значыць — у абстрагаванні ад праблемы кіраўнікоў прадпрыемстваў. Між тым, на думку старшыні райвыканкама, прычына болей глыбінная — у страце сувязяў паміж суб’ектамі прафілактыкі. Таму першапачатковая задача на бліжэйшую перспектыву — гэтую сувязь аднавіць. Улічваючы тое, што ўчыненыя непаўналетнімі злачынствы на рахунку, у асноўным, дзяцей са шматдзетных сем’яў, аддзелу адукацыі, спорту і турызму райвыканкама, іншым зацікаўленым службам рэкамендавана ўзмацніць маніторынгавую работу з дадзенай катэгорыяй грамадзян. Дапаўняючы дакладчыка, пракурор раёна Ігар Савасцееў адзначыў, што ніякіх новых мер у папярэджанні злачыннасці не патрабуецца, галоўнае тут — безагаворачна выконваць ужо прынятыя мерапрыемствы плана.

Падчас пасяджэння быў заслуханы таксама даклад кіраўніка спраў райвыканкама Наталлі Якімавай аб аналізе работы са зваротамі грамадзян у мінулым годзе. Пасяджэнне станоўча ацаніла тэндэнцыю змяншэння (-60 альбо 21,7 %) колькасці зваротаў. Пры гэтым Павел Найдзён выказаў спадзяванне, што дадзены факт звязаны менавіта з пашырэннем тлумачальнай работы сярод насельніцтва. Кіраўніка раёна цікавіла, ці можна было накіраванае ў райвыканкам пытанне вырашыць на месцы, у сельвыканкаме, ці меліся сярод абаснаваных зваротаў паўторныя, наколькі дэталёва прааналізаваны ўсе звароты грамадзян, і іншае, што ўказвае на ўсебаковую работу ў гэтым накірунку.

Усяго на павестцы дня стаяла 30 пытанняў. Па кожным з іх, з папраўкамі альбо без, былі прыняты адпаведныя рашэнні — кіраўніцтва да дзеяння для тых, хто адказны за іх выкананне.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.