Журналісты прынялі ўдзел у форуме

На працягу двух дзён, 13 і 14 снежня, у Мінску працаваў рэспубліканскі форум “Роль рэгіянальных СМІ ў развіцці сацыяльнага партнёрства”. Арганізатарамі мерапрыемства выступілі Федэрацыя прафсаюзаў Беларусі і Міністэрства інфармацыі Беларусі.

img_5738

Для журналістаў — а іх сабралася больш за 100 чалавек з розных рэгіёнаў Беларусі — была падрыхтавана змястоўная ўсебаковая праграма, якая ўключала ў сябе мерапрыемствы культурнага і адукацыйнага накірункаў, а таксама экскурсіі. Афіцыйная частка форуму, удзел у якой прынялі старшыня Федэрацыі прафсаюзаў Беларусі Міхаіл Орда і міністр інфармацыі Рэспуб­лікі Беларусь Лілія Ананіч, прайшла ў штаб-кватэры Нацыянальнага прафцэнтра.

Акцэнтуючы ўвагу на ролі прафсаюзаў у жыцці грамадства і чалавека, Міхаіл Орда адзначыў, што сёння ФПБ вядзе актыўную работу па самых важных для працоўных пытаннях. Гэта і захаванне асобных працоўных калектываў, і своечасовая выплата заробку, і г.д. У якасці прыкладу ён прывёў той факт, што толькі за 6 месяцаў сёлетняга года пры непасрэдным удзеле прафсаюзных юрыстаў на рабоце было адноўлена 79 чалавек, вернута больш за 17 млрд. недэмінаваных рублёў, якія былі незаконна ўтрыманы альбо не выплачаны наймальнікам. “За кожным з дадзеных выпадкаў стаіць няпростая гісторыя чалавека, які меў патрэбу ў дапамозе і якому мы змаглі дапамагчы”, — заўважыў старшыня ФПБ. Акрамя іншага, ён расказаў пра ініцыятывы, з якімі выступаюць прафсаюзы на гэты час — павелічэнне дапамогі па беспрацоўі, увядзенне дадатковых мер абароны для тых, хто працуе па кантрактнай форме найму, і выказаў спадзяванне на плённае супрацоў­ніцтва з работнікамі СМІ, вынікам якога стане з’яўленне на старонках газет яшчэ большай колькасці матэрыялаў аб чалавеку працы і праб­лемах, якія яго хвалююць.

У працяг размовы Лілія Ананіч адзначыла станоўчы эфект ад наладжанага мерапрыемства, якое стварыла магчымасць для адкрытай размовы прадстаўнікоў прафсаюзаў і журналістаў рэгіянальных СМІ, якія лепш за каго бачаць праблемы свайго раёна ці вобласці і, галоўнае, паказваюць, як сёння вырашаюцца пытанні сацыяльнай палітыкі ў дзяржаве.

Журналісты ў сваю чаргу пацікавіліся ў Міхаіла Орды перспектывамі работы нацыянальнага прафцэнтра, пытаннямі калектыўна-дагаварнога рэгулявання і некаторымі іншымі, што датычыліся розных накірункаў дзейнасці прафсаюзаў.

Закранаючы мерапрыемствы культурнай праг­рамы, нельга не адзначыць, наколькі моцныя ўражанні пакінуў ва ўдзельнікаў форуму прагляд прэм’еры відовішча-вандроўкі “Сем таямніц Беларусі”, падрыхтаванага сумеснымі намаганнямі ФПБ, Беларускага дзяржаўнага ўніверсітэта культуры і мастацтваў і Палаца культуры прафсаюзаў. Праект засяроджвае ўвагу гледача і на фактах гісторыі краіны, і на знакавых культурных з’явах, і на мастацкіх сімвалах Беларусі, па-новаму адлюстроўвае сучасны стан культурных каштоўнасцей нашай Радзімы. Усім, каму выпадзе магчымасць паглядзець пастаноўку, раю абавязкова яе скарыстаць.

Алена КАРПЕНКА. Фота Андрэя САЗОНАВА, газета «Іскра».

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.