Якаснага малака пабольшала

Як паведамілі ва ўпраўленні сельскай гаспадаркі і харчавання райвыканкама, работа, праведзеная апошнім часам спецыяліс­тамі раённых сельгасарганізацый і перапрацоўшчыкамі — работнікамі малочнага завода ВУП “Бабруйскмалако”, накіраваная на павышэнне якасці малака, дала станоўчыя вынікі.

Да прыкладу, за дзень 30 лістапада гатункам экстра ў раёне рэалізавана 70% ад агульнага аб’ёму прададзенага дзяржаве малака. Для параўнання, у гэты ж дзень мінулага года высокаякаснага малака было прададзена ўсяго каля 40%. Акрамя таго, зніжаны паказчык рэалізацыі яго першым гатункам (з 10 да 2,7 %).
Па выніках кастрычніка ААТ “Стасеўка” выключна ўсё малако паставіла на перапрацоўку гатункам экстра. Значна павялічылі продаж такога малака ў ААТ “Саўгас Кісялевічы” — 79% ад агульнага аб’ёму. У сярэднім па раёне дадзены паказчык за кастрычнік склаў 51%. Пры гэтым ёсць усе шанцы спадзявацца, як адзначыў в. а. намесніка начальніка райсельгасхарчу па жывёлагадоўлі Аляксандр Кісялёў, што па выніках лістапада статыстыка будзе болей прывабнай: у асобныя дні сутачная рэалізацыя малака гатункам экстра даходзіла да 70 і нават да 80%.

Паляпшэнне сітуацыі з якасцю малака ў раёне звязваюць з больш багатым рацыёнам жывёлы і лепшым доглядам. У мінулую зімоўку з-за недахопу травянога корму салома нярэдка выкарыс­тоўвалася не па традыцыйным прызначэнні — на падсцёл, а ў якасці корму. Сёлета і корму, і падсцілачных матэрыялаў, па словах Аляксандра Кісялёва, у дастатку, а значыць, і догляд рагуль больш якасны. Плюс да гэтага — выкананне мерапрыемстваў супрацьмасцітнай праграмы.

Між тым, апошняе не дае падстаў для паслаб­лення. Кантроль за якасцю малака і мерапрыемствы па яе павышэнні ў раёне будуць працягнуты. Каб дасягнуць пастаўленай перад малочнай галіной задачы — фермам з даільнымі заламі прадаваць гатункам экстра не меней за 90% ад агульнага аб’ёму пастаўляемага на перапрацоўку малака — жывёлаводчым калектывам асобных сельгасарганізацый трэба яшчэ працаваць і працаваць.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.