Школьнік з нашага раёна, чацвёртакласнік Каменскай сярэдняй школы Раман БУСЕЛЬ, — у ліку пераможцаў Рэспуб­ліканскага легкаатлетычнага спартыўна-­масавага мерапрыемства “300 талентаў для Каралевы”. Па выніках кідання мяча з-за галавы сярод хлопчыкаў 4-х класаў ён заняў 2-е месца.

Ганаровую ўзнагароду — Дыплом 2-й ступені, юнаму спартс­мену ўручыў знакаміты легкаатлет Беларусі, старшыня грамадскага аб’яднання “Беларуская федэрацыя лёгкай атлетыкі” Вадзім Дзевятоўскі.

Падрыхтаваў Рамана да спаборніцт­ваў настаўнік фізкультуры Міхаіл Шчарбакоў. Сам хлопчык, як адзна­чылі ў школе, здольнасці да спорту праяўляе з 1-га класа. Раман наведвае спартыўную секцыю і з задавальненнем удзельнічае ў спаборніцтвах.

Што датычыцца спартыўна-масавага мерапрыемства “300 талентаў для Каралевы”, то яно ў краіне рэалізуецца другі год. Праект накіраваны на выяўленне перспектыўных у спорце дзяцей для далейшых заняткаў лёгкай атлетыкай, якую па праву называюць каралевай спорту.

Алена КАРПЕНКА. Фота з архіву Каменскай СШ.