Прыемная статыстыка
Са студзеня па верасень сёлетняга года сямейны капітал прызначаны ў раёне 39 шматдзетным сем’ям. Гэта болей, чым за ўвесь мінулы год: у 2015-м рашэнні аб прызначэнні мацярынскага капіталу ў адпаведнасці з Указам Прэзідэнта Рэспублікі Беларусь № 572 ад 9 снежня 2014 года “Аб дадатковых мерах дзяржаўнай падтрымкі сямей, якія выхоўваюць дзяцей” былі прыняты ў адносінах 36 шматдзетных сем’яў.
Сямейны (мацярынскі) капітал — гэта аднаразовае прадастаўленне сем’ям безнаяўных грашовых сродкаў (10 000 долараў ЗША) пры нараджэнні (усынаўленні) трэцяга альбо наступных дзяцей. Выкарыстаць сродкі сямейнага капіталу можна толькі ў Беларусі ў поўным аб’ёме альбо часткамі па аднаму ці некалькіх накірунках: паляпшэнне жыллёвых умоў, атрыманне адукацыі, атрыманне паслуг у сферы сацабслугоўвання, аховы здароўя, на фарміраванне дадатковай пенсіі маці — у поўнай сям’і, аднаму з бацькоў — у няпоўнай. Магчымасць выкарыстаць мацярынскі капітал прадастаўляецца пасля таго, як дзіцяці, у сувязі з чыім нараджэннем такое права ў сям’і з’явілася, споўніцца 18 год. Датэрмінова: цалкам альбо часткова — на атрыманне членам сям’і платных медпаслуг у парадку і па пераліку, вызначаным Міністэрствам аховы працы.
… і сумная
З 23-х чалавек, якія пражываюць гэтым часам у аддзяленні кругласутачнага знаходжання для грамадзян пажылога ўзросту і інвалідаў Бабруйскага раённага цэнтра сацабслугоўвання насельніцтва, 16 — жанчыны, палова з якіх маюць альбо мелі (памерлі) дзяцей. І калі да пяці з 8 жанчын нашчадкі: дзеці ці ўнукі — наведваюцца, то тры жанчыны-маці прыемных сустрэч з роднымі пазбаўлены. Як паведаміла дырэктар цэнтра Таццяна Тарасевіч, сыны грамадзянак вядуць асацыяльны лад жыцця і тымі, хто даў ім жыццё, даўно не цікавяцца. На жаль…
Алена КАРПЕНКА.