На мінулым тыдні ў райвыканкаме працаваў 2-гі рэгіянальны сход дэпутатаў.

Яго ўдзельнікі: дэпутаты раённага і сельскіх саветаў дэпутатаў, органы самакіравання — старасты населеных пунктаў і іх памочнікі, прадстаўнікі райвыканкама і службаў раёна абмеркавалі меры па рэалізацыі Указа Прэзідэнта Рэспублікі Беларусь ад 23 сакавіка 2016 года № 107 “Аб аплаце жыллёва-камунальных паслуг, што аказваюцца насельніцтву”, а таксама правядзенне выбараў дэпутатаў Палаты прадстаўнікоў Нацыя­нальнага сходу Рэспублікі Беларусь шостага склікання. Узначаліў сход старшыня райсавета дэпутатаў Аляксандр Емяльянаў.

Абмеркаванне першага пытання вялося надзвычай актыўна, асабліва ў часці, што датычылася паслуг УКП “Жылкамгас”. Яно і зразумела: камунальшчыкі аказваюць найбольшую іх колькасць вяскоўцам. Пры гэтым калі на вырашэнне асобных праблем у камунальнай службы не дастае грошай — пра гэта паведаміў галоўны інжынер прадпрыемства Віктар Марозаў, то на выкараненне іншых патрабуецца ўсяго толькі сумленнасць работнікаў прадпрыемства. Апошняе датычыцца ў тым ліку ўборкі за сабой пляцовак для збору цвёрдых бытавых рэшткаў і смецця ў населеных пунктах. Нярэдкія выпадкі, калі пасля ад’езду прызначанай для гэтых мэт машыны кантэйнерная пляцоўка патрабуе… уборкі. Відавочна, што насельніцтва ад гэтага пакутаваць не павінна, а значыць — да арганізацыі сваёй работы камунальнальнікі павінны падыйсці больш адказна.

Нараканні і пажаданні былі выказаны і ў адрас іншых службаў, якія аказваюць паслугі насельніцтву. Да прыкладу, выконваючы заяўку па замене газавага балона, работнікі адпаведнай службы, на думку сходу, павінны загадзя ўведамляць гаспадара, у які дакладна час заяўка будзе выканана, а не прымушаць чалавека губляць дзень на чаканне. Гэтыя і іншыя праблемныя пытанні дэпутатаў і людзей, чые інтарэсы яны прадстаўляюць, сход адрасаваў прадстаўнікам адпаведных службаў са спадзяваннем на іх станоўчае вырашэнне.

З дакладам па другім пытанні выступіла начальнік аддзела арганізацыйна-кадравай работы райвыканкама Вольга Худакова.

Алена КАРПЕНКА.