На парозе — уборка зерневых
У раёне працягваецца корманарыхтоўчая кампанія. На гэты час, як паведамілі ва ўпраўленні сельскай гаспадаркі і харчавання райвыканкама, сена нарыхтавана 58% ад плану, сенажу — 68%.
Прычым, у ААТ “Стасеўка” яго ўжо нарыхтавалі амаль удвая болей ад патрэбы (193%). У філіяле “Харчавік-Агра” і ААТ “Аграмашсервіс” справіліся з нарыхтоўкай сенажу — 105% і 110% адпаведна. Сіласу ў раёне маецца пакуль толькі 5% ад патрэбы, але дадзены корм гаспадаркі ў асноўным плануюць рыхтаваць з кукурузы, таму гэтая работа наперадзе. У сярэднім на ўмоўную галаву ў раёне нарыхтавана травянога корму
12,2 ц к.адз. з 27,3 — неабходных на год.
Вядзецца ўборка азімай сурэпіцы, насеннікаў мнагалетніх траў на патрэбы раёна. Убіраецца азімы рапс. Ураджайнасць яго сёлета невысокая. На гэта, па словах в.а. намесніка начальніка райсельхасхарчу Арыны Сяргеевай, паўплывалі як надвор’е — для рапсу было малавата дажджоў, так і напастка ў выглядзе капустнай молі, ад якой, каб пазбавіцца, прыйшлося праводзіць дадатковыя хімапрацоўкі.
На гэтым тыдні раён таксама плануе прыступіць да ўборкі зерневых.
Алена КАРПЕНКА.