У аб’ектыве — перадавікі “Саўгаса Кісялевічы”
Менавіта механізатары гэтай гаспадаркі, па выніках на ўчарашні дзень, прызнаны лідарамі на ўборцы травянога корму.
Не парушаючы добрай традыцыі дзякаваць працаўнікоў палёў за дасягненне высокіх паказчыкаў у рабоце і падбадзёрваць іх да плённай працы ў далейшым, на сенажаці сельгаспрадпрыемства напярэдадні наведаўся старшыня райкама прафсаюза работнікаў АПК Сяргей Феднеў і мы — карэспандэнты “раёнкі”, у чыёй традыцыі рабіць фотаздымкі працоўных будняў земляробаў на памяць. Выказаўшы перадавікам корманарыхтоўкі цёплыя словы прызнання і пашаны Сяргей Іванавіч уручыў Удзячнасці Бабруйскага райвыканкама за добрасумленную працу, вымпелы і чырвоныя сцяжкі райкама галіновага прафсаюза занятым на перавозцы сянажнай масы Аляксандру Міхайлавічу Рагалевічу і Фёдару Аліханавічу Кантаеву, а таксама Канстанціну Ігаравічу Сілівончыку, у чыіх абавязках зграбаць правяленую масу ў валкі. У аб’ектыў фотакарэспандэнта трапіў і бусел. І гэта таксама незнарок: трактарысты жартуюць — без гэтых мудрых “павадыроў” добрых вынікаў у рабоце наўрад ці можна было дасягнуць.
Алена КАРПЕНКА. Фота аўтара.
