Выязны абласны семінар старшынь райгаркамаў прафсаюза работнікаў адукацыі і навукі працаваў на базе нашага раёна на працягу 9 і 10 чэрвеня.

Перад пачаткам семінару яго ўдзель­нікі ўсклалі кветкі да Кургана Славы ў вёсцы Сычкава, ушанавалі памяць тых, хто, вызваляючы Беларусь ад ворага, застаўся навечна ляжаць у бабруйскай зямлі. Пасля гэтага лідары раённых прафарганізацый пад началам старшыні Магілёўскага абкама прафсаюза работнікаў адукацыі і навукі Сяргея Вінаградава пераехалі ў Ленінскі ВПК “Дзіцячы сад-СШ”, дзе іх прывіталі намеснік старшыні райвыканкама Святлана Носава, начальнік аддзела адукацыі, спорту і турызму Алена Баркоўская, старшыня раённага аб’яднання прафсаюзаў Людміла Крычко, старшыня райкама галіновага прафсаюза Таццяна Бокач. Дырэктар вучэбна-педагагічнага комплексу Франц Танковіч пазнаёміў гасцей са школай, старшыня прафкама Іна Русак расказала пра дзейнасць арганізацыі і пра тое, якім чынам ва ўстанове ажыццяўляецца кантроль за выкананнем умоў Калектыўнага дагавору. Улічваючы тое, што мэта семінару, як адзначыў Сяргей Вінаградаў, — навучыць правільна прымяняць нормы заканадаўства, мерапрыемства хутка перарасло ў практыкум. Па словах Таццяны Бокач, тэма “Аб рабоце па ажыццяўленні грамадскага кантролю за выкананнем заканадаўства аб працы і абароне сацыяльна-эканамічных правоў і законных інтарэсаў членаў прафсаюза ва ўстановах адукацыі Бабруйскага раёна” выбрана невыпадкова: гэта адзін з найважнейшых напрамкаў дзейнас­ці прафсаюзаў. Яна звярнула ўвагу на тыповыя парушэнні працоўнага заканадаўства, якія выяўляюцца ў выніку праверак ва ўстановах адукацыі. Галоўны прававы інспектар працы абкама прафсаюза Аляксандр Ермаловіч, які таксама прыняў удзел у семінары, правёў практычны занятак па прымяненні нормаў працоўнага заканадаўства. Далей удзельнікі мерапрыемства пераехалі ў Каменскую дапаможную школу-інтэрнат, дзе пазнаёміліся са шляхамі ўзаемадзеяння адміністрацыі школы і пярвічнай прафсаюзнай арганізацыі ў рабоце па ажыццяўленні грамадскага кант­ролю за выкананнем заканадаўства аб працы. Завяршыўся першы дзень работы семінару знаёмствам з аздараўленчым лагерам “Бабраня-2010”.

Насычанай была для прафсаюзных лідараў і пятніца. У гэты дзень яны пазнаёміліся з Цялушскім ВПК “Дзіцячы сад-СШ”, даведаліся аб практыцы рашэння праблемных пытанняў выканання заканадаўства аб працы ва ўстанове.

У час падвядзення вынікаў выязнога семінару Сяргей Вінаградаў, разам з іншым, заакцэнтаваў увагу на неабходнасці такой формы работы, якая дазваляе не толькі вырашыць на практыцы тыя ці іншыя праблемныя пытанні прымянення норм заканадаўства, але і дае магчымасць пазнаёміцца з іншымі рэгіёнамі, з вопытам іх прафсаюзнай дзейнасці.

Напрыканцы мерапрыемства яго ўдзельнікі наведалі магілу ўнучкі А.С. Пушкіна Наталлі Варанцовай-Вельямінавай у Цялушы, усклалі да яе кветкі.

Алена КАРПЕНКА. Фота Юрыя ЮРКЕВІЧА.