Беларускі фонд міру адзначыў юбілей
У красавіку сёлетняга года 55-годдзе з дня заснавання адзначыла адно са старэйшых грамадскіх аб’яднанняў — Беларускі фонд міру. Урачыстасць з гэтай нагоды прайшла ў мінулую пятніцу ў сталічнай філармоніі.
Удзел у ёй прынялі дзяржаўныя і грамадскія дзеячы краіны, прадстаўнікі органаў выканаўчай і заканадаўчай улады, кіраўнікі ўсіх канфесій, паслы і прадстаўнікі дыпламатычнага корпусу краін свету. Дэлегацыю нашага раёна ўзначаліла старшыня раённай арганізацыі Беларускага фонду міру, намеснік старшыні райвыканкама Святлана Носава.
Падчас святочнага форуму быў зачытаны Прывітальны адрас ад Прэзідэнта. У ім было адзначана, што за гады існавання фондам міру праведзена значная міратворчая работа, аказана садзеянне ў аднаўленні сотні помнікаў. Фонд падтрымлівае ветэранаў Вялікай Айчыннай вайны і працы, аказвае дапамогу дзецям-сіротам. Пра тое, што ў нашай краіне кансалідацыя Фонда міру існуе не на словах, а на справе, і пацверджанне таму — самыя розныя маштабныя праекты, гаварылі і намеснік кіраўніка Адміністрацыі Прэзідэнта Беларусі Ігар Бузоўскі, і Мітрапаліт Мінскі і Заслаўскі, Патрыяршы экзарх усёй Беларусі Павел, і многія іншыя.
Віншуючы прысутных з юбілейнай датай, старшыня праўлення Беларускага фонду міру Максім Місько заўважыў, што суайчыннікі сёння могуць ганарыцца найбольшым дасягненнем незалежнай Беларусі — адсутнасцю вайны на тэрыторыі краіны. Пры гэтым адзначыў, што сваю дзейнасць фонд накіроўвае на ўмацаванне міру і дружбы паміж людзьмі і народамі.
Падчас форуму актывістам грамадскага аб’яднання былі ўручаны ўзнагароды — нагрудны знак Беларускага фонду міру “Заслужаны міратворца”, а творчыя калектывы падарылі прысутным цудоўную канцэртную праграму.
Алена КАРПЕНКА.