Раённы дзень аховы працы, прымеркаваны да Сусветнага дня, прайшоў у чацвер на базе УКП “Жылкамгас”.

Яго арганізатарам выступіла ўпраўленне па працы, занятасці і сацабароне райвыканкама пры садзеянні сацыяльных партнёраў: раённага адб’яднання прафсаюзаў і савета наймальнікаў. Удзел у мерапрыемстве прыняла і намеснік начальніка міжраённага аддзела абласнога ўпраўлення Дэпартаменту дзяржінспекцыі працы Л. Балакер.

Першая частка дня насіла практычны характар і прайшла на створаным на тэрыторыі жылкамгасу вучэбна-трэніровачным палігоне. Падчас яе вядучы інжынер па ахове працы прадпрыемства А. Нарочных на прыкладзе макета калодзежа расказаў, а яго падначаленыя паказалі, як бяспечна працаваць з апошнім, пачынаючы ад атрымання нараду-допуску да закрыцця калодзежа. Тут жа было прадэманстравана, як бяспечна працаваць у траншэі.

Тэарэтычную частку, якая прайшла ў класе па ахове працы, адкрыў А. Кулакоўскі, галоўны спецыяліст упраўлення па ПзіС. Ён давёў да прысутных інфармацыю пра стрэс на працы, які здольны прывесці да сур’ёзных захворванняў работніка, і тое, як яго не дапусціць. Старшыня раённага аб’яднання прафсаюзаў Л. Крычко распавяла пра ажыццяўленне грамадскага кантролю па ахове працы з боку прафсаюзаў.

Заакцэнтавала ўвагу на тым, што ў мэтах паляпшэння работы ў дадзеным накірунку ў раёне створана камісія па ахове працы, і добра было б, каб у яе рабоце не было месца фармалізму. Апаратчык хімводаачысткі, грамадскі інспектар па ахове працы жылкамгасу К. Барыскава пазнаёміла з ажыццяўленнем штодзённага кантролю па АП у арганізацыі. У заключэнне мерапрыемства спецыялістам былі дадзены кансультацыі па тэме і завострана ўвага на тым, што дробязяў у пытаннях бяспекі працы быць не можа, бо за імі — здароўе і жыццё людзей. А гэта для наймальніка і дзяржавы было і застаецца ў прыярытэце.

Алена КАРПЕНКА. Фота Юрыя ЮРКЕВІЧА.