Рабіць не як ёсць, а як трэба

Семінар па гатоўнасці сельскагаспадарчых арганізацый раёна да правя­дзення веснавых палявых работ прайшоў у мінулую пятніцу на базе філіяла «Агракамбінат КХП» ААТ «Бабруйскі КХП». Удзел у мерапрыемстве прынялі старшыня райвыканкама Аляксандр Осіпаў, спецыялісты райсельгасхарчу на чале з начальнікам Анатолем Ланкуцем, дырэктар Магілёўскага абласнога Цэнтра павышэння кваліфікацыі работнікаў кіруючага складу і спецыялістаў Якаў Яроцкі, начальнік аддзела ДАІ РАУС Сяргей Казлоўскі, намеснік начальніка між­раённага аддзелу абласнога ўпраўлення Дэпартаменту дзяржінспекцыі працы Людміла Балакер, а таксама кіраўнікі і галоўныя спецыялісты гаспадарак.

IMG_07014На прыкладзе філіялу «Агракамбінат КХП», дзе да палявых работ ужо прыступілі, удзельнікам семінару было прадэманстравана, як павінна быць падрыхтавана сярэдняя гаспадарка да адказнай кампаніі, а таксама як, у мэтах зніжэння сабекошту вытворчасці, механізатарам сумесна з інжынернай службай філіялу ўдалося дапрацаваць некаторыя механізмы і дэталі сельгастэхнікі, у прыватнасці, загрузчыкі зерня, мінеральных угнаенняў. У сваю чаргу, Якаў Яроцкі даў слушныя парады, што ў гэтым плане, не прыцягваючы дадатковыя матэрыяльныя сродкі, можна зрабіць яшчэ. Па традыцыі аўтарытэтны эксперт зрабіў падказкі адносна асноўных настроек і рэгуліровак тэхнікі, нагадаў, што толькі няўхіснае выкананне тэхналагічных патрабаванняў падчас ворыва і іншых відаў палявых работ здольна прывесці да станоўчых вынікаў у раслінаводстве.

Падчас абмеркавання пытанняў арганізацыі веснавых палявых работ, гатоўнасці сельгасарганізацый да іх правядзення, забяспечанасці гаспадарак насеннем, кіраўнік раёна, разам з іншым, заакцэнтаваў увагу на неабходнасці строгага падыходу да кантролю за палівам. Адзначыў, што тых GPS-навігатараў, якія маюцца ў раёне, недастаткова, каб забяспечыць строгі ўлік гаручага, а гэта значыць — варта паклапаціцца аб іх набыцці. Акрамя таго, Аляксандр Осіпаў указаў на неабходнасць замацаваць у кожнай гаспадарцы канкрэтнага чалавека, які б ажыццяўляў кантроль за палівам.

Значная ўвага была ўдзелена пытанням аховы працы падчас палявых работ. Паводле слоў Людмілы Балакер, кантроль за выкананнем асноўных патрабаванняў апошняга: правядзеннем інструктажаў, мед­аглядаў работнікаў, забяспечанасці іх спецадзеннем, клопат пра тых, хто будзе працаваць з хімікатамі, — прамы абавязак кожнага кіраўніка.

Не для каго не сакрэт, што спраўны работнік — сыты работнік, таму шмат увагі было ўдзелена тэме арганізацыі харчавання, а таксама працоўнага спаборніцтва работнікаў, занятых на сяўбе. Пра іх расказаў старшыня райкама прафсаюза работнікаў АПК Сяргей Феднеў. Не абыйшлі ўдзельнікі семінару і такія актуальныя пытанні, як арганізацыя дарожнага руху з удзелам сельскагаспадарчай тэхнікі, парадак запаўнення пярвічных бухгалтарскіх дакументаў у перыяд правядзення палявых работ, матэрыяльнае стымуляванне занятых на сяўбе. Што датычыцца апошняга, то, як было адзначана, вельмі важна, каб налічэнне заробку ў гаспадарках было празрыстым. Інфармацыя пра аплату ўсіх відаў работ павінна быць змешчана на інфармацыйных стэндах, каб кожны работнік, ведаючы аб’ёмы выкананай ім работы і — абавязкова — ацэнку яе якасці, мог самастойна падлічыць заробак.

З улікам таго, што зусім хутка работы ў полі стануць масавымі, старшыня райвыканкама заклікаў
удзельнікаў семінару падыйсці да іх з максімальнай адказнасцю, правесці сяўбу ў аптымальныя тэрміны і пры высокай якасці, каб зямлі было за што аддзячыць земляробам.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.