На парозе сяўбы

Трымаючы кірунак у філіял “Варатынь” ААТ “БЗТДіА” на сустрэчу з працоўным калектывам па пытаннях падпіскі на «раёнку» на 2-гі квартал, якая гэтым часам у разгары, звяртаем увагу на палі паўз шашы. Ачышчаныя ад снегу, налітыя вільгаццю і абласканыя сакавіцкім сонейкам, яны, здаецца, заклікаюць людзей да актыўных дзеянняў…

19470Разумеючы, што гэтае ўражанне, як і само сакавіцкае надвор’е, могуць быць падманнымі, усё ж вырашаем пацікавіцца ў памочніка дырэктара па сельскай гаспадарцы ААТ “БЗТДіА” Аляксандра Атрохава планамі адносна пачатку масавых палявых работ і падрыхтаванасцю да іх.

— Гаспадарка да веснавых работ, можна сказаць, падрыхтавана: у парадку асноўная тэхніка, завозім мінеральныя ўгнаенні. Лічу, што ўжо можна, як кажуць у народзе, “падкрадацца” да сяўбы. Мы пакуль у палі не ідзем: вядзем актыўную работу па назапашванні дызельнага паліва, з якім сёлета даводзіцца нялёгка, у першую чаргу з-за недахопу корму для жывёлагадоўлі. Апошні прыходзіцца вазіць літаральна штодня з Мінскай вобласці. Дарога няблізкая і патрабуе шмат паліва. Але, вядома ж, пачатак палявых работ трымаем на кантролі, магчыма, ужо ў бліжэйшы час прыступім да іх масава. Увогуле чакаем новага сельскагаспадарчага года з надзеяй і спадзяванннямі на тое, што ён складзецца для нас больш спрыяльна, чым папярэдні. Што да пастаўленых задач на весну, то, упэўнены, мы справімся з імі. Ва ўсялякім разе калектыў на гэта настроены. Ужо правялі з механізатарамі сход, на якім акрэслілі задачы кожнага падчас сяўбы, абмеркавалі праблемныя пытанні.

У размове з кіраўніком філіяла не абыйшлі тэму мінеральных угнаенняў. У мінулым годзе яны былі ў гаспадарцы ў дэфіцыце — уняслі 43 працэнты ад патрэбы. Сёлета, па словах Аляксандра Атрохава, сітуацыя абяцае быць лепшай. Ужо заключаны дагаворы на пастаўку з салігорскім калійным заводам, з гродзенскім “Азотам”, прымаюцца рашэнні па аплаце. У сувязі з тым што “Варатынь” — адна з гаспадарак, далучаных да прамыслоўцаў, некаторай падтрымкі можна чакаць і з гэтага боку: губернатар вобласці заклікаў кіраўніцтва заводаў актыўна паўдзельнічаць у падтрымцы сельскагаспадарнікаў.

На запытанне, ад чаго ў раслінаводстве залежыць ураджайнасць у большай ступені, — ад надвор’я ці ўгнаенняў, тых жа мінералаў, — кіраўнік філіялу адказвае неадназначна.

— Усё ўзаемазвязана, — заўважае ён. — Мы ў мінулым годзе ўнеслі адносна мала мінеральных угнаенняў, некаторыя ж — сто працэнтаў, а вынік быў адзін і той жа. Анамальная спякота перакрэсліла ўсё. Практыка паказвае — з прыродай змагацца немагчыма. Але з іншага боку — зямлю не падманеш, як казаў мой папярэднік Віктар Тумашэнка. Калі не будзеш уносіць у глебу арганіку, мінеральныя ўгнаенні, то добрага ўраджаю не дасягнеш. Таму, нягледзячы на цяжкасці з палівам, мы і арганіку актыўна вывозім на палі, і вырашаем пытанні з мінеральнымі ўгнаеннямі.

Размову вяла Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.