Без увагі не застаецца ніводная праблема
Праблемныя пытанні вяскоўцаў і гараджан, якія маюць дачыненне да сельскай мясцовасці, “сцякаюцца” у аддзел па рабоце са зваротамі грамадзян і юрыдычных асоб райвыканкама. Тут іх рэгіструюць, перанакіроўваюць — калі маецца такая патрэба — кампетэнтным службам ці ў арганізацыі для вырашэння, кантралююць апошняе. Звароты пры гэтым аналізуюць, што дазваляе выявіць слабыя звенні ў жыццядзейнасці раёна.
У мінулым годзе, як адзначыла начальнік аддзела Н.Г. Тропіна, у райвыканкам паступіла 276 зваротаў ад грамадзян і 16 — ад юрыдычных асоб (у параўнанні з 2014 г. — 79 і 69% адпаведна). Нягледзячы на зніжэнне агульнай колькасці зваротаў, нязначна пабольшала калектыўных і паўторных. Праўда, усе 4 паўторныя звароты былі прызнаны неабаснаванымі. Прыкладна палова зваротаў задаволена, шмат па якіх былі дадзены тлумачэнні. 15% зваротаў працягваюць заставацца на кантролі. У асноўным у райвыканкам звярталіся вяскоўцы — 68% ад агульнай колькасці, але меліся пытанні і ў жыхароў сталіцы, іншых гарадоў Беларусі, Расіі.
Амаль трэцяя частка зваротаў тычылася камунальна-бытавых пытанняў і добраўпарадкавання. Грамадзян таксама хвалявалі жыллёвыя пытанні, архітэктуры і будаўніцтва, землеўпарадкавання, працы і зарплаты. Характэрна, што пры агульным зніжэнні зваротаў вырасла колькасць (з трох да пяці) тых, што датычацца міліцыі (у тым ліку рэгістрацыі па месцы жыхарства) і сельскай гаспадаркі.
Камунальна-бытавыя пытанні ў асноўным закраналі рамонт грамадскіх калодзежаў, адсутнасці вады ў іх, утрыманне могілак, пазбаўленне ад непатрэбных дрэў. Нямала зваротаў датычылася садаводчых таварыстваў, пытанняў землеўпарадкавання, вызначэння межаў зямельных надзелаў. Калектыўна грамадзяне звярталіся па пытаннях будаўніцтва і функцыянавання сетак водазабеспячэння (жыхары аграгарадкоў Цялуша і Леніна, пас. Юбілейны, в. Ламы), газіфікацыі (в. Бярэзавічы), раскладу руху транспарту (г. Бабруйска, в. Бабіна-1), прыватызацыі жылых памяшканняў (работнікі філіяла “Варатынь” ААТ “БЗТДіА”) і інш. Калектыўных зваротаў у аблвыканкам у мінулым годзе было 4. Жыхары Бабруйска, да прыкладу, звярталіся ў вышэйшы орган па пытанні будаўніцтва сетак электразабеспячэння на зямельных участках, вылучаных пад будаўніцтва жылля, работнікі цэнтральнай раённай бібліятэкі — перамяшчэння ўстановы ў іншы будынак.
Пры тым, што ў раёне створана сістэма работы са зваротамі грамадзян, здольная забяспечыць няўхіснае выкананне патрабаванняў заканадаўства, выпрацоўваюцца яе новыя формы: анкетаванне, маніторынгі насельніцтва, сустрэчы ў працоўных калектывах і па месцы жыхарства. Маецца паштовая скрыня старшыні райвыканкама. Кіраўнікі падраздзяленняў, падчас наведвання сельгасарганізацый цікавяцца праблемнымі пытаннямі грамадзян. Штосуботы ў выканкаме працуюць “прамыя тэлефонныя лініі”, на якія ў мінулым годзе паступіла болей за 50 зваротаў. Кіраўніцтвам раёна праведзена 75 асабістых прыёмаў, у тым ліку 22 — старшынёй выканкама. Праведзены 21 выязны прыём, з іх 4 — старшынёй.
У мэтах папярэджання фармалізму ў рабоце са зваротамі грамадзян па-за ўвагай аддзела, па словах начальніка, не засталіся парушэнні парадку іх разгляду і ажыццяўлення адміністрацыйных працэдур у арганізацыях. У выніку чаго 7 чыноўнікаў дзяржапарату і адказных асоб арганізацый былі прыцягнуты да дысцыплінарнай адказнасці.
Алена КАРПЕНКА.
Новае ў заканадаўстве
Аматарам беспрычынных скаргаў пагражаюць штрафы
З 23 студзеня ўступіў у сілу Закон Рэспублікі Беларусь ад 15 ліпеня 2015 № 306-З «Аб унясенні змен і дапаўненняў у Закон Рэспублікі Беларусь «Аб зваротах грамадзян і юрыдычных асоб», які ўнёс адпаведныя змены і дапаўненні ў раней дзеючы Закон аб зваротах грамадзян. Даводзім асноўныя з іх.
— Сфера дзеяння Закона аб зваротах грамадзян не распаўсюджваецца на звароты работніка да наймальніка.
— Удакладняюцца выпадкі, калі могуць адмовіць у асабістым прыёме, запісе на яго: звароты па пытаннях, якія не адносяцца да кампетэнцыі гэтых арганізацый; звароты ў нявызначаныя дні і гадзіны; калі заяўніку падчас асабістага прыёму ўжо быў дадзены вычарпальны адказ на пытанні, якія яго цікавяць; калі з заяўнікам спынена перапіска па выкладзеных у звароце пытаннях.
— Удакладняецца сэнс п. 2 ар. 19 Закона аб зваротах грамадзян у частцы выдаткаў, якія могуць быць спагнаныя з заяўнікаў у выпадку накіравання сістэматычна неабаснаваных зваротаў (тры і болей разоў на працягу года) у адну і тую ж арганізацыю, да аднаго і таго ж індывідуальнага прадпрымальніка ад аднаго і таго ж заяўніка, а таксама зваротаў, якія ўтрымліваюць заведама ілжывыя звесткі.