4-ты Пленум райкама прафсаюза работнікаў аграпрамысловага комплексу з удзелам загадчыка аддзела арганізацыйна-кадравай работы Магілёўскага абласнога камітэта прафсаюза работнікаў АПК Генадзя Шпакоўскага і старшыні Бабруйскага раённага аб’яднання прафсаюзаў Людмілы Крычко прайшоў у райвыканкаме. Падчас яго былі падведзены вынікі работы райкама за бягучы год, пастаўлены задачы на будучы і вырашаны некаторыя арганізацыйныя пытанні.

У сваім дакладзе старшыня райкама прафсаюза работнікаў АПК Сяргей Феднеў адзначыў, што работа камітэта ў 2015 годзе, як і ў папярэднія гады, была накіравана на кантроль за выкананнем калектыўных дагавораў арганізацый, паляпшэнне ўмоў працы работнікаў, папярэджанне няшчасных выпадкаў на вытворчасці, своечасовую выплату зарплаты і яе рост.

Сяргей Феднеў завастрыў увагу на тым, што, у сувязі з рэарганізацыяй сельгаспрадпрыемстваў шляхам іх інтэграцыі з арганізацыямі-інвестарамі, а таксама далучэннем да эканамічна-устойлівых гаспадарак, колькасць членаў прафсаюза з 2012 года знізілася амаль на 1 тысячу (на сёння — 7534). Пры гэтым у мінулым годзе створаны дзве новыя “пярвічкі”: на УП “Бабруйскмалако” і ЗАТ “Птушкафабрыка “Вішнёўка”. Было адзначана, што райкамам прафсаюза сумесна з упраўленнем сельскай гаспадаркі і харчавання райвыканкама было заключана раённае Пагадненне. У ім і ў калектыўных дагаворах арганізацый утрымліваюцца абавязацельствы, накіраваныя на забеспячэнне стабільнай работы працоўных калектываў, арганізацыю працоўнага спаборніцтва, выпрацоўку стымулаў маральнага і матэрыяльнага заахвочання высокапрадукцыйнай працы, умацаванне вытворчай дысцыпліны. Райкамам прафсаюза рэгулярна праводзіцца маніторынг выканання заканадаўства аб працы, прымянення кантрактнай формы найму. Прафкам актыўна ўдзельнічае ў вырашэнні жыллёвых пытанняў членаў прафсаюза. Сумесна з наймальнікамі праводзіць работу па стварэнні здаровых і бяспечных умоў працы на вытворчасці, кантролі за выкананнем Дырэктывы №1. У сувязі з апошнім у мінулым годзе за парушэнні працоўнага заканадаўства і норм аховы працы на арганізацыі і іх кіраўнікоў былі накладзены штрафы. Інспектары выявілі каля 500 парушэнняў, якія ў далейшым былі выпраўлены. І хоць няшчасных выпадкаў, звязаных з вытворчасцю, у раёне ў мінулым годзе не зарэгістравана, работу па іх прафілактыцы, як было адзначана, нельга прызнаць дастатковай: за 9 месяцаў мелі месца болей за 180 выпадкаў прыцягнення работнікамі міліцыі да адміністрацыйнай адказнасці грамадзян за з’яўленне іх у грамадскім месцы ў нецвярозым стане, знаходжанне вартавой аховы ў п’яным выглядзе і адсутнасці на працоўным месцы, “п’янае” кіраванне транспартам. Усё гэта сведчыць пра тое, адзначыў С.І. Феднеў, што райкаму прафсаюза і лідэрам галіновых “пярвічак” ёсць над чым працаваць у далейшым.

Было адзначана, што адным з прыярытэтаў у дзейнасці прафсаюзаў з’яўляецца фарміраванне здаровага, адукаванага і духоўна выхаванага чалавека. Станоўча рэалізуецца маладзёжная палітыка. Маладым работнікам вылучаюцца лепшыя працоўныя месцы, давяраецца новая тэхніка, прадастаўляецца жыллё ці вылучаюцца ільготныя крэдыты на яго будаўніцтва. Закрануўшы фінансавы стан раённай арганізацыі, Сяргей Феднеў між тым заўважыў, што тут маюцца недапрацоўкі — валавы збор прафсаюзных узносаў за 2015 год у параўнанні з папярэднім істотна знізіўся. Значная запазычанасць па іх у СВК “Калгас імя А. Неўскага”, Бабруйскага ААТ “Аграмашсервіс”, іншых арганізацый.

Далей распавялі аб праведзенай рабоце па выкананні калектыўных дагавораў, арганізацыі сацыяльнага партнёрства старшыні прафсаюзных “пярвічак” ААТ “Чырвоны харчавік”, Бабруйскага філіялу ААТ “Булачна-кандытарская кампанія “Дамачай”, ДУКДП “МДСК”, БДПЛ №13, СВК “Калгас імя А. Неўскага”.
Традыцыйна з навагоднімі віншаваннямі да ўдзельнікаў раённага пленума звярнуўся Генадзь Шпакоўскі, які заклікаў членаў райкама прафсаюза, старшынь прафсаюзных арганізацый “на месцах” быць больш настойлівымі ў дасягненні пастаўленай мэты — безагаворачнага выканання калектыўных дагавораў, і няўхісна адстойваць і абараняць інтарэсы членаў прафсаюза.

Удзельнікі пленума выпрацавалі Пастанову, згодна якой раённы камітэт прафсаюза, прафкамы і прафгрупы павінны будуць кіравацца ў сваёй далейшай рабоце рашэннямі 7-га з’езду Федэрацыі прафсаюзаў Беларусі, Праграмай дзейнасці ФПБ на 2015-2020 гады, Праграмай асноўных накірункаў дзейнасці Беларускага прафсаюза работнікаў АПК на гэты перыяд, а таксама Пастановай 4-га пленума Бабруйскай раённай прафсаюзнай арганізацыі работнікаў АПК, у аснове якіх — клопат пра чалавека.

Алена КАРПЕНКА.