Падведзены вынікі агляду мехдвароў
Падведзены вынікі штогоднага раённага агляду-конкурсу па добраўпарадкаванні машынных двароў і гатоўнасці рамонтна-абслуговай базы сельгасарганізацый да работы ў зімовых умовах, па падрыхтоўцы машынна-трактарнага парку да палявых работ будучага года.
У склад камісіі, якая падводзіла вынікі агляду, уваходзілі спецыялісты ўпраўлення сельскай гаспадаркі і харчавання райвыканкама і Бабруйскай раённай інспекцыі дзяржтэхнагляду. Узначальваў камісію першы намеснік старшыні райвыканкама, начальнік райсельгасхарчу А.Л. Ланкуць. Маніторынг раённых гаспадарак у гэтым плане, як адзначыў член камісіі, начальнік раённай інспекцыіі дзяржтэхнагляду М.М. Голуб, на працягу падрыхтоўчага перыяду праводзілі таксама прадстаўнікі абласной і рэспубліканскай інспекцый дзяржтэхнагляду.
Супаставіўшы праробленую ў сельгасарганізацыях падрыхтоўчую работу і ўсе крытэрыі ацэнкі гатоўнасці мехдвароў, раённая камісія прыйшла да высновы прысудзіць па выніках агляду 1-е месца філіялу “Харчавік-Агра” ААТ “Чырвоны харчавік”, 2-е — СВК “Гігант”, 3-е — СВК “Калгас імя Дзяржынскага”. Са станоўчага боку ў гэтым плане адзначаны таксама філіял “Варатынь” ААТ “БЗТДіА”.
На пасяджэнні райвыканкама прынята рашэнне прэміраваць арганізацыі-пераможцы з раённага бюджэту: за 1-е месца ў памеры 20 базавых велічынь, за 2-е — 15, за 3-е — 10 базавых велічынь.
Акрамя таго, кіраўнікам сельгасарганізацый рэкамендавана матэрыяльна заахвоціць інжынерна-тэхнічных работнікаў, механізатараў і іншых асоб, якія прынялі актыўны ўдзел у падрыхтоўцы да агляду-конкурсу, з уласных сродкаў гаспадарак.
Алена КАРПЕНКА. Фота з архіву рэдакцыі.