У сераду ў актавай зале раённага Цэнтра культуры прайшоў семінар-вучоба для работнікаў галіны, прысвечаны пытанням прафілактыкі ВІЧ-інфекцыі.

Мерапрыемства было арганізавана аддзелам ідэалагічнай работы, культуры і па справах моладзі райвыканкама сумесна з Бабруйскім занальным цэнтрам гігіены і эпідэміялогіі ў межах выканання Дзяржаўнай праграмы прафілактыкі ВІЧ-інфекцыі на 2011-2015 гады. Арганізатары ставілі за мэту павысіць узровень інфармаванасці работнікаў культуры па праблемах, звязаных з ВІЧ, а праз іх — і ўзровень інфармаванасці ўсяго насельніцтва раёна.

Звяртаючыся да ўдзельнікаў семінару, урач-эпідэміёлаг БЗЦГіЭ Ларыса Касперовіч давяла да іх апошнія статыстычныя дадзеныя, што характарызуюць распаўсюджанасць ВІЧ-інфекцыі як па краіне ў цэлым, так і па Магілёўскай вобласці, і Бабруйшчыне ў прыватнасці. Ларыса Фёдараўна завастрыла ўвагу на ўстойлівым росце выяўляемых год ад году выпадкаў ВІЧ-інфекцыі, а значыць, і неабходнасці ва ўзмацненні прафілактычнай работы з насельніцтвам.

Дапаўняючы сказанае слайд-прэзентацыяй, урач-эпідэміёлаг у каторы раз нагадала прысутным спосабы перадачы інфекцыі, выяўлення і лячэння ВІЧ, а таксама ўнесла свае прапановы адносна форм і метадаў прафілактычнай работы ў гэтым накірунку непасрэдна работнікамі культуры.

Алена КАРПЕНКА.