За 10 месяцаў сёлетняга года раённым аддзелам ЗАГС зарэгістравана 706 актаў грамадзянскага стану жыхароў раёна (за аналагічны перыяд мінулага — 732).

Нараджэнняў сёлета зарэгістравана болей, чым у мінулым годзе — 140 супраць 125, смярцей прыкладна столькі ж — 382 супраць 381. А вось шлюбаў раённым ЗАГСам у бягучым годзе зарэгістравана значна меней: 106 супраць 160. Апошняе, па словах загадчыка аддзела Таццяны Лісоўскай, хутчэй за ўсё звязана з той акалічнасцю, што цяпер рэгістраваць шлюб грамадзяне Беларусі могуць у любым аддзеле ЗАГС, незалежна ад таго, дзе яны пражываюць. Са 140 зарэгістраваных актаў аб нараджэнні 73 канстатавалі з’яўленне на свет грамадзян мужчынскага полу, 67 — жаночага. 45 дзяцей (прыкладна трэць ад агульнай колькасці) зарэгістраваны па заяве маці, г. з. нарадзіліся ў так званых маці-адзіночак. У папярэднія гады, у сувязі з розніцай у памеры дзяржаўнай дапамогі на дзіця, гэты паказчык быў прыкметна большым. Сярод найбольш часта сустракаемых імёнаў нованароджаных — Арцём і Кацярына. У тройцы лідэраў таксама Кірыл і Раман, Мілана і Сафія. З забытых сустракаюцца Таццяна, Таісія, Сцяпан, Юрый. Заўважаны і нетрадыцыйныя для Беларусі — Ільяс, Рэнат, Лесана, Эмілія. І зноўку, як і на працягу 20 апошніх год — ніводнай Галіны! (падказка для тых бацькоў, хто хоча, каб імя ў дзіцяці было арыгінальным).

Алена КАРПЕНКА.