Аты-баты…
Адпраўка прызыўнікоў да месца службы ў сёлетнюю восеньскую кампанію падыходзіць да завяршэння.
У панядзелак аднымі з апошніх у войска былі адпраўлены юнакі, якія будуць несці службу ў часцях г. Бабруйска. Сярод іх і жыхар нашага раёна Ілья Феакцістаў, з якім мы пагутарылі непасрэдна перад ад’ездам ад ваенкамата:
— Прызваны ў войска з аг. Вялікія Бортнікі. Буду служыць у бабруйскай зенітна-ракетнай часці. Пра тое, што ўяўляе сабой служба, ведаю: на мінулым тыдні з гэтай часці дэмабілізаваўся мой брат. Настрой на службу пазітыўны: шмат што разлічваю спазнаць, шмат чаму навучыцца, памужнець. Бацькі за мяне не хвалююцца: служыць буду блізка, таму будуць да мяне час ад часу наведвацца. Абяцала бываць і дзяўчына, што таксама радуе.
Па традыцыі праводзіць прызыўнікоў да месца службы ля ваенкамата на Маскоўскай сабраліся іх родныя і сябры. Матулі і бабулі давалі апошнія парады і настаўленні на дарогу, бацькі трымаліся ў асноўным стрымана: маўляў, усё гэта мы праходзілі. Пры гэтым літаральна ўсе з іх адзначалі, што для хлопцаў служба ў войску — справа патрэбная: дае магчымасць авалодаць ваеннай спецыяльнасцю, фізічна і маральна загартоўвае.
Алена КАРПЕНКА. Фота аўтара і Юрыя ЮРКЕВІЧА.