Тэхніку ставяць на зімовае захаванне

Асноўныя палявыя работы завершаны. тэхніку, якая не задзейнічана, у гаспадарках ставяць на зімовае захаванне.

На гэты час, як адзначыў начальнік вытворчага аддзела ўпраўлення сельскай гаспадаркі і харчавання райвыканкама Яўген Бярозкін, пастаўлены на захаванне практычна ўсе зернеўборачныя камбайны, пераважная частка бульбаўборачных — у раёне застаюцца невыкапанымі лічаныя гектары клубняў. На захаванні знаходзяцца ўсе віды сеялак, 82 працэнты ад агульнай колькасці зернесушыльных комплексаў, прыкладна 60 працэнтаў глебаапрацоўчай тэхнікі — астатняя яшчэ задзейнічана на падняцці зябліва. У рабоце пакуль і частка кормаўборачных камбайнаў. Пры гэтым начальнік вытворчага аддзела выказаў упэўненасць, што да 1 лістапада ўся тэхніка, якая да таго часу “выйдзе” з работы, будзе пастаўлена на зімовае захаванне — такую задачу паставіў перад райсельгасхарчам кіраўнік вобласці.
Адначасова з пастаноўкай тэхнікі ў парадак прыводзяцца мехдвары, падрыхтоўваюцца да работы ў халодны перыяд рамонтныя майстэрні. Апошняе, па словах начальніка вытворчага аддзела, асабліва актуальна. Нягледзячы на праведзеную немалую работу ў гэтым плане, маюцца яшчэ і нявырашаныя пытанні, “закрыць” якія неабходна ў бліжэйшы час — у раёне праходзіць месячнік па навядзенні чысціні і парадку. Па словах Яўгена Бярозкіна, у гаспадарках павінны разумець, што на рабочым месцы ў зімовую пару, акрамя таго што чыста, павінна быць цёпла і ўтульна.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.