Урачыстае ўшанаванне 20 000-га абанента тэлефоннай сувязі, падключанага па тэхналогіі xPON, адбылося ў чацвер на гэтым тыдні ў сервісным цэнтры Бабруйскага вузла электрасувязі Магілёўскага філіяла РУП “Белтэлекам”. Ім стала пастаянны кліент кампаніі — бабруйчанка Наталля Цімчанка, якая з 2010 года з’яўляецца абанентам by fly. Цяпер дзякуючы тэхналогіі xPON стала даступна больш высокая хуткасць доступу ў сетку Інтэрнэт, а таксама магчымасць выкарыстання інтэрактыўнага тэлебачання ZALA на два і болей тэлевізары, дадатковых сэрвісаў, прагляду болей за 100 тэлевізійных каналаў як SD, так і HD, 3D фармату.

Пра тое, што “выцягнула шчаслівы білет” і яе чакае падарунак ад кампаніі, Наталля, з яе слоў, дазналася напярэдадні ўрачыстасці. Вядома ж, узрадавалася. Тым болей што ў якасці падарунка атрымала сертыфікат, які дае права на бясплатнае падключэнне і карыстанне пакетам ZALA “усё ўключана”, а таксама тарыфным планам “Рэкорд 20” ад by fly тэрмінам на 1 год з моманту падключэння, і сувеніры на памяць. Усё гэта ў прысутнасці работнікаў і карыстальнікаў Белтэлекама, а таксама журналістаў мясцовых СМІ ўручыў юбілейнаму абаненту начальнік Бабруйскага вузла электрасувязі Аляксандр Бабцоў. Ен адзначыў, што першы абанент xPON быў падключаны на бабруйшчыне ў 2011 годзе. З таго часу дадзеная тэхналогія трывала развівалася. Па ёй падключаецца новае жыллё ў горадзе і перападключаецца тое, што ўжо выкарыстоўвалася. На гэты час такім чынам падключаны практычна ўвесь мікрараён Даманскі, часткова — 6-ы, вядзецца падключэнне дома па вул. Урыцкага, дзе і прыйшлі да 20-тысячнага абанента. Дадзеную тэхналогію, па словах Аляксандра Бабцова, на бабруйшчыне плануюць развіваць. Яе прыцягальнасць у тым, што абаненту можа быць прадастаўлены ўвесь комплекс базавых (тэлефонная сувязь, доступ да сеткі Інтэрнэт, інтэрактыўнае тэлебачанне) і дадатковых паслуг па адным валакне. Для падключэння да тэхналогіі xPON абаненту бясплатна ўстанаўліваецца мадэм, дзякуючы якому і падключаюцца ўсе паслугі.

Алена КАРПЕНКА. Фота Юрыя ЮРКЕВІЧА.